चक्कु प्रहारबाट किशोरको हत्या, दुई युवक पक्राउ

दैलेख । दैलेखको दुल्लू नगरपालिका-४ शान्ति बजारमा चक्कु प्रहारबाट एक किशोरको हत्या भएको छ ।फुटबल खेलेर घर फर्किँदै गरेका १६ वर्षीय प्रकाश खनालमाथि चक्कु प्रहार भएको हो ।

चक्कु प्रहारबाट गम्भीर घाइते भएका खनालको दुल्लू अस्पतालमा उपचारका क्रममा मृत्यु भएको जिल्ला प्रहरी कार्यालय दैलेखले जनाएको छ।

घटनामा संलग्न रहेको आरोपमा प्रहरीले दुल्लू नगरपालिका–१० गमौडीका १९ वर्षीय मुकुन्द शाही र १९ वर्षीय विभूषण शाहीलाई पक्राउ गरेको छ । तीन जनाबिच भएको विवादका क्रममा उक्त घटना भएको प्रारम्भिक अनुसन्धानबाट खुलेको प्रहरीले जनाएको छ।

घटनापछि फरार भएका दुवै जनालाई प्रहरीले घटनास्थलबाट करिब १० किलोमिटर टाढा चामुण्डाको जंगलबाट नियन्त्रणमा लिएको हो।