प्रणयशमशेर राणाले पनि छाडे रास्वपा, भने : ‘बेथितिका बाबजुद मूकदर्शक भएर बस्न विवेक र इमानले मानेन’

काठमाडौं । राष्ट्रिय स्वतन्त्र पार्टी (रास्वपा) का नेता प्रणयशमशेर राणाले पार्टी सदस्यताबाट राजीनामा दिएका छन् । उनले रास्वपामा बेथिति बढेको र त्यसका बाबजुद मूकदर्शक भएर पार्टीमै रहिरहन आफ्नो विवेक र इमानले नमानेका कारण राजीनामा दिएको बताएका छन् । 

उनले बिहीबार महामन्त्री कवीन्द्र बुर्लाकोटीलाई सम्बोधन गरेर पठाएको पत्रमा लेखेका छन्, ‘सबै बेथितिका बाबजुद मूकदर्शक भएर पार्टीमै रहिरहन मेरो विवेक र इमानले नमानेका कारण आजको मितिबाट राष्ट्रिय स्वतन्त्र पार्टीको सम्पूर्ण जिम्मेवारीबाट राजीनामा गरेको ब्यहोरा जानकारी गराउन चाहन्छु ।

उनले आन्तरिक अभ्यास सही ढंग नगर्ने पार्टीले भोलि सरकारमा गएर उत्कृष्ट काम गर्छ भन्ने विश्वास आफूले गर्न नसक्ने र अन्धभक्ति गर्न पनि नचाहेको पत्रमा उल्लेख गरेका छन् ।

प्रतिनिधिसभा निर्वाचनका लागि रास्वपाले गरेको ‘प्राइमरी इलेक्सन’ प्रति पनि असन्तुष्ट देखिँदै आएका राणाले भनेका छन्, ‘प्राइमरी चुनावमा सधैँ ५० प्रतिशत चलखेलको बाटो राखियो । अहिले आएर विशेष परिस्थितिको नाममा संगठनको आफ्नो नेतृत्व छान्ने अधिकार पनि लुटियो, १ हजार सदस्यता शुल्कबाट ३०० पालिकामा आउने भनेको कहिले आएन, प्राइमरीका प्रक्रियामात्र नभई त्यसका लागि भनी उठाइएको ठूलो रकममा पनि आर्थिक अपारदर्शिता÷अपचलन देखियो ।’

पार्टी स्थापनाकालमा गरिएको रास्वपाको वाचा ‘बेथितिको अन्त्य थितिको थालनी’ ठीक उल्टो भएर ‘थितिको अन्त्य–बेथितिको थालनी’ हुन पुगेको राणाको टिप्पणी छ । उनले भनेका छन्, ‘सीमित केही बोल्ने साथीहरूको हविगत आम नेपालीलाई थाहा भइसकेको छ, सुशासन, जबाफदेहिता, आर्थिक पारदर्शिता अब पार्टीको नारामा मात्रै सीमित रहेको छ, अभ्यासमा फिटिक्कै छैन !’