धार्मिक सहिष्णुतामा खलल पुर्‍याउनेमाथि कडा कारबाही गर्ने सरकारको चेतावनी

काठमाडौं । सरकारले धार्मिक समुदायबिच हिंसा भड्काउने खालका गतिविधिमा संलग्नमाथि कडा कारबाही गर्ने भएको छ ।

आइतबारर सिंहदरबारमा गृहमन्त्री ओमप्रकाश अर्यालको उपस्थितिमा बसेको केन्द्रीय सुरक्षा समितिको बैठकले मधेश प्रदेशमा धार्मिक तथा साम्प्रदायिक हिंसा भड्काउने खालका गतिविधि तत्काल नियन्त्रण गर्नका लागि आवश्यक कानुनी कारबाहीलाई अघि बढाउने निर्णय गरेको हो ।

त्यसैगरी बैठकले त्यस्ता खालका गतिविधिमा संलग्न जिल्लाहरुमा धार्मिक सदभाव र सहिष्णुता बढाउनका समन्वयात्मक रुपमा प्रवद्र्धनात्मक कार्यहरु सञ्चालन गर्न प्रदेश र स्थानीय सरकारलाई समेत आग्रह गरेको गृह मन्त्रालयका प्रवक्ता आनन्द काफ्लले जानकारी दिए ।

मधेश प्रदेशको वीरगञ्ज, जनकपुरलगायतका जिल्लाहरुमा टिकटकमा हिन्दुस्तानको नाम लिँदै एक भिडियो पोष्ट गरी धार्मिक सहिष्णुतामा खलल पुग्ने खालको भिडियो बनाइएको भन्दै हिंसात्मक गतिविधि अघि बढेपछि सरकारले त्यस्ता खालका गतिविधि हुन नदिनका लागि कडाईका साथ निगरानी राख्न पनि स्थानीय प्रशासनलाई सचेत गराएको छ ।

त्यसैगरी सो विषयमा गृह मन्त्रालयले सोमबार (भोलि) राष्ट्रिय मानव अधिकार आयोग लगायतसँग पनि छलफल गर्न बैठक बोलाएको छ । बैठकमा जेन–जी आन्दोलनको क्रममा फरार रहेका कैदीहरुलाई पक्राउ गर्ने अभियानलाई तिव्रता दिन पनि गृहमन्त्री अर्यालले प्रहरी प्रशासनलाई सचेत गराउनु भएको थियो ।

प्रवक्ता काफ्लेले भने, ‘आजको केन्द्रीय सुरक्षा समितिको बैठकमा विशेष गरी यो निर्वाचनको तयारीको सन्दर्भमा सुरक्षा निकायहरुबाट भईरहेको तयारीको बारेमा छलफल गरिएको थियो भने अर्कोतिर धार्मिक समुदायको बीचमा एक अर्कालाई लक्षित गरेर जुन गलत र आपत्तिजनक टिप्पणी गर्ने एवं अर्काको धर्ममा खलल पुर्‍याउने गरी भइरहेको ती गतिविधिहरु छन् । ती विषयहरुमा हामीले आज छलफल गर्‍यौँ । विशेष गरी निर्वाचनको सन्दर्भमा कुरा गर्दा हाम्रा सुरक्षा निकायहरुले अहिलेसम्म के कस्तो तयारी गरिरहनु भएको छ ? उहाँहरुलाई हामीले गरिदिनुपर्ने समन्वयको पार्टहरु के हुन् ? त्यो पार्टमा हामीले छलफल गर्‍यौँ । अर्को जिल्लाहरुमा विशेष गरी फरार कैदीबन्दीहरुको विषयमा अझ वडा तहसम्म पुगेर भएपनि त्यसलाई अझ हाम्रो जुन अभियान छ, त्यसलाई थप प्रभावकारी ढंगले अघि बढाउनु पर्छ भन्ने विषयमा छलफल भएको छ । सँगसँगै अहिले यो जुन अर्कोको धर्ममा खलल पुर्‍याउने गरेर गतिविधि भइरहेको भन्ने कुरा आइराखेको छ । त्यस्ता कार्यहरुलाई कानूनको दायरामा ल्याएर कारबाही गर्ने, यो जिल्लाहरुमा धार्मिक सदभाव र सहिष्णुता बढाउनका लागि स्थानीय प्रशासनहरुले समन्वयात्मक रुपमा प्रवद्र्धनात्मक कार्यहरु सञ्चालन गर्ने, सँगसँगै प्रदेश र स्थानीय तहहरुलाई पनि यस्ता कार्यक्रमहरु सञ्चालन गर्नका लागि अनुरोध गर्ने भन्ने निर्णय भएको छ । सँगसँगै भोली हामी यही विषयलाई केन्द्रित गरेर राष्ट्रिय मानव अधिकार आयोगलगायतका संवैधानिक आयोगहरुसँग सुरक्षा निकायहरुसहित भोली गृह मन्त्रालयमा छलफल गर्ने भन्ने कुराहरु भएका छन् । यिनै विषयहरुमा केन्द्रित भएर आजको केन्द्रिय सुरक्षा समितिको बैठक बस्यो ।’

बैठकमा सुरक्षा निकायका प्रमुखहरुले निर्वाचनको तयारीका बारेमा भईरहेका कामबारे गृहमन्त्री अर्याललाई ब्रिफिङ पनि गरेका थिए ।