काठमाडौं । गृहमन्त्री ओमप्रकाश अर्यालले निर्वाचन हुँदैन भन्दै भ्रम फैल्याउने काम गरे सैह्य नहुने चेतावनी दिएका छन् ।
सोमबार पोखरामा आयोजित गण्डकी प्रदेशस्तरीय सुरक्षा गोष्ठीलाई सम्बोधन गर्दै उनले सो चेतावनी दिएका हुन् ।
गृहमन्त्री अर्यालले एमालेलाई लक्षित गर्दै निर्वाचनबाट भाग्ने र हुँदैन भनेर भ्रम फैल्याउने र सुशासनलाई कमजोर बनाउने काम गर्नु, गराउन न्यायोचित नहुने पनि स्पष्ट पारे । उनले वर्तमान सरकार निर्वाचन गराउने गरी बनेको उल्लेख गर्दै त्यस कामलाई सम्पन्न गर्न लागि परेको बताए ।
मन्त्री अर्यालले तोकिएकै मितिमा निर्वाचन सम्पन्न गराउन र जनताले अनुभुति हुनेगरी निष्पक्ष ढंगबाट कार्य सम्पादन गराउने गरी आवश्यक योजना तयार गरी कार्यान्वयनमा लैजान पनि सुरक्षा निकायहरुलाई निर्देशन दिए ।
उनले भने, ‘निर्वाचनबाट भाग्ने, निर्वाचन हुँदैन भनि भ्रम फैलाउने र सुशासनलाई कमजोर बनाउने काम कहीँकतैबाट पनि गर्नु र गराउन न्यायोचित हुँदैन । यो सरकारको निर्माण नै निर्वाचनमार्फत निर्वाचित सरकारलाई जिम्मेवारी हस्तान्तरण गर्ने उद्देश्य अनुरुप भएको हो । तोकिएको मितिमा निर्वाचन सम्पन्न गर्न गण्डकी प्रदेशमा रहेका सुरक्षाका चुनौतिहरुको सामना गर्न सक्षम हुने गरी प्रदेश र जिल्लाहरुले आफ्ना आफना सुरक्षा योजनाहरु तयार गरी कार्यान्वयनमा ल्याउनु हुनेछ । सुरक्षा गोष्ठी सम्पन्न गरी कार्यस्थलमा फर्कदा हाम्रो कार्यशैली जनताले महशुस हुनेगरी सुधार हुनेछ । कानून राज्यको अवधारण अनुरुप स्वतन्त्र र निष्पक्ष ढंगबाट कार्य सम्पादन गरिनेछ । सो को अनुभूति आम नागरिकमा हुनेगरी सुशासन कायम हुनेछ ।’
मन्त्री अर्यालले जनताले महशुस गर्नेगरी आफ्नो काममा सुधार गर्न पनि सुरक्षा निकायहरुलाई सचेत गराए ।
त्यसो त नेकपा एमालेले निरन्तर वर्तमान सरकारले निर्वाचन गराउन नसक्ने भन्दै आलोचना गर्दै आइरहेको छ ।
यो खबर पढेर तपाईलाई कस्तो महसुस भयो ?
प्रतिक्रिया