काठमाडौं । नेपाली कांग्रेसले पूर्वमन्त्री आमोदप्रसाद उपाध्यायको निधनप्रति दुःख व्यक्त गर्दै शोक प्रस्ताव पारित गरेको छ ।
सोमबार पार्टी केन्द्रीय कार्यालय सानेपामा बसेको आकस्मिक केन्द्रिय कार्यसमितिको बैठकले पूर्वमन्त्री उपाध्यायको निधनमा शोक प्रश्ताव पारित गरेको हो ।
नेपालको लोकतान्त्रिक आन्दोलनको योद्धा उपाध्यायको ९१ वर्षको उमेरमा क्यान्सरका कारण गत शनिबार निधन भएको थियो ।
उपाध्याय २०५१ सालमा राष्ट्रिय सभा सदस्य र तत्कालिन मोरङ क्षेत्र नम्बर–१ बाट दुई पटक निर्वाचित सांसद समेत हुन् । २०५६ सालको उपनिर्वाचनमा निर्वाचित भएपछि उनी शिक्षामन्त्री बनेका थिए ।
उपाध्यायले २०६४ सालको पहिलो संविधानसभा निर्वाचनमा पनि जित हाँसिल गरेका थिए ।
२०७० सालमा भएको दोस्रो संविधानसभा निर्वाचनमा समेत उनी उम्मेद्वार रहेका थिए ।
समाजसेवा र पार्टीको विभिन्न जिम्मेवारीमा रहेर नेपाली कांग्रेसको संगठन निर्माण र नेपालको लोकतान्त्रिक आन्दोलनमा नेतृत्वदायी भुमिका निर्वाह गरेका उपाध्यायको निधनबाट पार्टीले एक अग्रज र अनुभवी नेतृत्व गुमाएको पार्टीका सहमहामन्त्री महालक्ष्मी उपाध्यायले बताइन् ।
बैठकले शोक सन्तप्त परिवारजन र आफन्तजनप्रति समवेदना प्रकट गरेको छ ।
सहमहामन्त्री उपाध्यायकाअनुसार कांग्रेसले मंसिर २९, पुस १ र २ गते गरी तीन दिनसम्म पार्टीको केन्द्रीय कार्यलय, प्रदेश र जिल्ला कार्यलयहरुमा पार्टीको झण्डा आधा झुकाउने निर्णय समेत गरेको छ ।
बैठकले पुस १ गते तीन वटै तहका पार्टी कार्यलय बन्द गर्ने, स्वार्गरोहणको १३ दिनसम्म तीन वटै तहका पार्टी कार्यलयमा शोक पुस्तिका राख्ने र १३ औँ दिनमा मोरङमा शोक सभाको आयोजना गर्ने निर्णय गरेको सहमहामन्त्री उपाध्यायले बताइन् ।
यो खबर पढेर तपाईलाई कस्तो महसुस भयो ?
प्रतिक्रिया