एमालेको ११औँ महाधिवेशन उद्घाटन गर्दै ओलीले भने- ‘म ढुक्कले भन्न सक्छु एमाले अजम्बरी छ’

काठमाडौं। नेकपा (एमाले) का अध्यक्ष केपी शर्मा ओलीले शनिबार भक्तपुरको सल्लाघारीस्थित तीनकुनेमा आयोजित पार्टीको ११औँ महाधिवेशन उद्घाटन समारोहमा आफ्नो पार्टी अजम्बरी रहेको दाबी गरेका छन् ।

उद्धाटन समारोहमा बोल्दै अध्यक्ष ओलीले मुलुकमा लोकतन्त्र अजय रहेको र एमाले अजम्बरी रहेको बताए । उनले जेनजी आन्दोलनप्रति लक्षित गरी एमालेको सान्दर्भिकता सकिएको भन्ने प्रयास गर्नेहरूका धुवाँ, खरानी र निषेधका प्रहारहरू पार्टीले चिर्दै आफ्नो महाधिवेशनमा भव्य जनसागर देखाएको उल्लेख गरे ।

अध्यक्ष ओलीले भने, ‘तपाईँहरूको यो भव्य उपस्थिति देखेर म गौरवान्वित भएको छु। सम्झिरहेको छु–तीन महिना अघिका ती कहालीलाग्दा दिनहरु। जतिबेला देश युद्ध भूमि जस्तै जलिरहेको थियो । आततायीहरुबाट 

जलाईरहिएको थियो । जतिबेला संविधान, लोकतन्त्र, र यसका आधार स्तम्भ राजनीतिक दलहरुमाथि भीषण हमला भइरहेको थियो। एउटा भाष्य निर्माण गर्ने कोसिस भइरहेको थियो–पुराना पार्टीहरू सकिए, पुराना नेताका दिन गए, नेकपा एमालेको सान्दर्भिकता समाप्त भयो । तर आज यहाँ यो जनसागर उर्लिएको छ। म ढुक्कले भन्न सक्छु–लोकतन्त्र अजय छ, नेकपा एमाले अजम्बरी छ ।’

अध्यक्ष ओलीले संविधान, लोकतन्त्र र त्यसको स्तम्भका रूपमा रहेका राजनीतिक दलहरुमाथि भएको हमला स्वीकार्य नहुने पनि जोड दिए ।