यस्तो छ सशस्त्र प्रहरीको दर्जागत दरबन्दी, कुल संख्या ३७,१५३ [पत्रसहित]

काठमाडौं । सशस्त्र प्रहरी बल नेपालको संगठन तथा व्यवस्थापन सर्वेक्षण सर्वेक्षण प्रतिवेदन–२०८२ स्वीकृत भएसँगै कुल दरबन्दी संख्या ३७ हजार १ सय ५३ कायम भएको छ । 

साधारण समूह (साधारण उपसमूह), साधारण समूह (लेखा उपसमूह), साधारण समूह (कानुन उपसमूह) प्राविधिक समूह (सञ्चार तथा इन्जिनियरिङ) र प्राविधिक समूह (स्वास्थ्यतर्फ) गरी कुल स्वीकृत दर्जागत दरबन्दी संख्या ३७ हजार १ सय ५३ कायम भएको हो । 

मन्त्रिपरिषद्को गत मंसिर २ गतेको बैठकले सशस्त्रको संगठन तथा व्यवस्थापन सर्वेक्षण सर्वेक्षण प्रतिवेदन–२०८२ पारित गरेको थियो । त्यसपछि संघीय मामिला तथा सामान्य प्रशासन मन्त्रालय राष्ट्रिय किताबखाना (प्रहरी) लैनचौर, काठमाडौंले मंसिर ५ गते कार्यालय, दरबन्दी संरचना र पदबारेको पत्र सशस्त्र प्रहरी बल प्रधान कार्यालयमा पठाएको थियो । चलानी नम्बर ४२५०  रहेको सो पत्रको जानकारी मानवस्रोत विभागले मंसिर ११ गते जानकारी एवं कार्यार्थ भन्दै संगठनका सम्पूर्ण एकाईहरुलाई पठाएको थियो । 

जसअनुसार सशस्त्र प्रहरी महानिरीक्षक (आईजीपी) १, अतिरिक्त महानिरीक्षक (एआईजी) ३, नायव महानिरीक्षक (डीआईजी) २१, वरिष्ठ उपरीक्षक (एसएसपी) ४३, उपरीक्षक (एसपी) १ सय ७५, र नायव उपरीक्षक (डीएसपी) ४ सय ८८ रहेको छ । 

यसैगरी, सशस्त्र प्रहरी निरीक्षक १ हजार १ सय ३७, वरिष्ठ नायव निरीक्षक एक सय, नायव निरीक्षक १ हजार ३ सय ८५, सहायक निरीक्षक १ हजार ६ सय १६, वरिष्ठ हबल्दार २ हजार ७ सय ९५, हबल्दार ५ हजार ३ सय ७०, सहायक हबल्दार ८ हजार ३ सय ६२, जवान १३ हजार ६ सय ७४ र परिचर १ हजार ९ सय ८३ कायम गरिएको छ ।

कुल दरबन्दी ३७ हजार १ सय ५३ रहेकोमा साधारण समूह साधारण उपसमूहअन्तर्गत ३६ हजार ६४ जना राखिएको छ । जसमा १ सशस्त्र प्रहरी महानिरीक्षक, ३ सशस्त्र प्रहरी अतिरिक्त महानिरीक्षक, १८ सशस्त्र प्रहरी नायव महानिरीक्षक, ३५ सशस्त्र प्रहरी वरिष्ठ उपरीक्षक, १ सय ४८ सशस्त्र प्रहरी उपरीक्षक, ४ सय १८ नायव उपरीक्षक र ९ सय ५८ सशस्त्र प्रहरी निरीक्षक रहेका छन् । 

यसैगरी लेखा उपसमूहमा २ सय १ र कानुन उपसमूहमा १४ जनाको दरबन्दी संख्या रहेको छ । २ सय १ जना दरबन्दी रहेको लेखा उपसमूहको. सबैभन्दा ठूलो पद एसएसपी (१) जना रहने व्यवस्था गरिएकोमा १४ जना दरबन्दी रहेको कानुन उपसमूहमा भने डीआईजीको दरबन्दी राखिएको छ । 

यसैगरी, प्राविधिक समूह सञ्चार तथा इन्जिनियरिङतर्फ ५ सय ८८ जनाको दरबन्दी कायम भएको छ । जसको नेतृत्व यसअघिदेखि डीआईजीबाट हुँदै आएको छ । यस्तै, स्वास्थ्यतर्फको दरबन्दी संख्या २ सय ८६ कायम भएको छ । यसको नेतृत्व पनि डीआईजीबाटै हुँदै आएको छ ।