पश्चिमी वायु र अरब सागरको न्यून चापीय प्रणालीको प्रभाव : आज यी प्रदेशमा हुनेछ वर्षासहित हिमपात

काठमाडौं । हाल देशमा पश्चिमी वायुको साथै अरब सागरमा बनेको न्यून चापीय प्रणालीको प्रभाव रहेको मौसम पूर्वानुमान महाशाखाले जनाएको छ ।

उक्त प्रणालीको प्रभावले देशभर साधारणतया बदली देखिएको छ भने गण्डकी र बागमती प्रदेशका केही भूभागमा छिटपुट वर्षा भइरहेको छ ।

महाशाखाका अनुसार आज दिउँसो गण्डकी, लुम्बिनी, कर्णाली र सुदूरपश्चिम प्रदेशलगायतका पहाडी भूभागमा साधारणतया बदली रहनेछ भने तराई भूभागमा आंशिक बदली हुने सम्भावना छ । गण्डकी, लुम्बिनी र कर्णाली प्रदेशका केही स्थानहरूमा तथा बाँकी प्रदेशका पहाडी तथा हिमाली भूभागका थोरै स्थानहरूमा मध्यम वर्षासहित हिमपात हुने सम्भावना रहेको छ ।

त्यस्तै, गण्डकी प्रदेशका उच्च पहाडी तथा हिमाली भूभागका एक–दुई स्थानमा भारी वर्षासहित हिमपात हुने सम्भावना रहेको महाशाखाले जनाएको छ । आज राति पनि बागमती, गण्डकी, लुम्बिनी र कर्णाली प्रदेशलगायतका पहाडी भूभागमा साधारणतया बदली रहने र तराई भूभागमा आंशिक बदली रहने पूर्वानुमान गरिएको छ ।