काठमाडौं । मन्त्री बन्ने सूचीमा रहेका खगेन्द्र सुनारको नाममा विवाद भएपछि प्रधानमन्त्री सुशीला कार्की आन्तरिक छलफलमा जुटेकी छन् ।
सुनार दुईवटा मुद्दाका फरार अभियुक्त रहेको भन्दै उनलाई मन्त्री बनाउन नहुने मत एकाएक बढेपछि प्रधानमन्त्री कार्कीले यसमा समीक्षा गर्न लागेको स्रोतको दाबी छ ।
नेपाल प्रहरीको क्रिमिनल रेकर्ड सिस्टम (सीआरएस) ले समेत उनी दुई वटा मुद्दाको फरार अभियुक्त भएको देखाएको छ । यति मात्र नभई उनले एक महिला अधिवक्ताविरुद्ध लेखेको फेसबुक स्ट्याटसका कारण पनि सुनारलाई मन्त्री बनाउन नहुने मत बलियो बनेको छ ।
प्रधानमन्त्री निकट स्रोतका अनुसार प्रधानमन्त्री कार्की आफ्नो मन्त्रिपरिषदमा विवादित व्यक्तिहरू नपरुन् भन्नेमा सचेत देखिएकी छन् ।
‘उहाँ अहिले मन्त्रीहरूसँग छलफल गर्दै हुनुहुन्छ । सम्भवतः एक जना मन्त्रीको नाममा पुनर्विचार हुन सक्छ,’ बालुवाटार स्रोतले भन्यो ।
विवादित छविका सुनारलाई मन्त्री बनाउने तयारी भइरहँदा प्रधानमन्त्री सुशीला कार्कीको चर्को आलोचना भइरहेको छ । सुनारलाई श्रम तथा रोजगार मन्त्री बनाउने प्रधानमन्त्री कार्कीको तयारी रहेको समाचार यसअघि नै सार्वजनिक भइसकेको छ । आज साढे २ बजे सुनारलगायत चार जनालाई मन्त्रीको शपथ दिलाउने तयारी पनि भइरहेको छ ।
नेपाल प्रहरी प्रधान कार्यालयको चारित्रिक प्रमाणपत्र जारी गर्ने चालचलन शाखाका अनुसार उनले दुईवटा अभियोगमा कैद भुक्तान गर्न बाँकी छ । सूचीमा उनको नाम अहिले पनि फरार अभियुक्तका रूपमा रहेको छ ।
उनका विरुद्ध काभ्रेपलान्चोक जिल्ला अदालतबाट विद्युतीय कारोबार मुद्दामा पक्राउ पुर्जी जारी भएको थियो । यो मुद्दाको फर्स्यौट नभएको प्रहरी रेकर्डमा उल्लेख छ ।
यस्तै उनीमाथि जिल्ला अदालत सुर्खेतले २०८१ असार २१ मा पक्राउ पुर्जी जारी गरेको थियो । पक्राउ पुर्जीका आधारमा पनि उनी पक्राउ पर्न बाँकी र सजाय भुक्तान गर्न बाँकी देखिने प्रहरी स्रोतले जनाएको छ । अदालतले सुर्खेत प्रहरीलाई पक्राउ पुर्जीबारे २०८१ मंसिर २१ गते पनि ताकेता गरेको थियो ।
त्यसबेला सुनारमाथि सुर्खेतमा मेहेलकुना अस्पतालका प्रमुख डा. सोजन सापकोटामाथि हातपात तथा स्वास्थ्य संस्था तोडफोडको अभियोगमा पक्राउ पुर्जी जारी भएको थियो ।
यस्तै, सुनारविरुद्ध सर्वोच्च अदालतमा विचाराधीन मुद्दासमेत रहेको पाइएको छ । अधिवक्ता मनीषा गौतमले हालेको मुद्दामा गत असोज ६ गते पेसी तोकिएको भए पनि सर्वोच्च अदालत जलेपछि स्थगन भएको थियो ।
जाजरकोटमा मारिएका नवराज विकको मुद्दामा उच्च अदालत सुर्खेतले सुनाएको फैसला चित्त नबुझेपछि सुनारले अदालतबाहिर वितण्डा मच्चाएका थिए । उनले अदालत परिसरमा हुलहुज्जत र गेटमा तोडफोड गर्नुका साथै न्यायाधीशहरूविरुद्ध धम्कीपूर्ण अभिव्यक्तिहरू दिएका थिए । त्यसपछि अधिवक्ता गौतमले मानहानिको मुद्दा हालेकी थिइन् । गत वैशाख २१ मा सो मुद्दा दर्ता भएको थियो ।
यो मुद्दामा सर्वोच्च अदालतले प्रतिवादी सुनारलाई झिकाउने आदेश दिएको थियो । सोपश्चात् सुनारले सर्वोच्चकी न्यायाधीश सपना मल्ल प्रधानलाई पनि गालीगलौज गरेर लेखेका थिए । सोपश्चात् अदालतले टिप्पणी उठाएर मुद्दा दर्ता गरेको थियो ।
गौतम सर्वोच्च गएपश्चात् सुनारले उनलाई गालीगलौज गर्दै फेसबुकमा स्ट्याटस लेखेका थिए । त्यसबेला सुनारले गौतमलाई लक्षित गर्दै ‘तँ नेपाल बारकी होस कि ठमेल बारकी’ भन्दै स्ट्याटस लेखेका थिए । गौतमको फोटो र मोबाइल नम्बर फेसबुकमा राख्दै सुनारले लेखेका थिए, ‘यसलाई यो नम्बर ९८६०….फोन गरेर सोधौँ– त नेपाल बारको होस् कि ठमेल बार को ?’
उनले फेरि अर्को एउटा पोष्टमा लेखेका थिए, ‘कालो कोटको आडमा कालो धन्दावाली– तँलाई तेरै अदालतमा कानुन पढाउने दम छ हामीसँग । तसँग दम छ ? दिउँसै कालोधन्दा गर्ने नेपाल बार र राति धन्दा गर्ने ठमेलको बारमा के फरक छ ?’
त्यसपछि गौतम साइबर ब्युरोमा जाहेरी लिएर गएकी थिइन् । सुनारले लेखेको स्ट्याटसको स्क्रिनसट लिएर जाँदा पनि ब्युरोले मुद्दा दर्ता गरेन । बरु ‘तपाईंको घर काभ्रे रहेछ, त्यहीँको अदालतमा जानू’ भनेर पठाइदिएको गौतम बताउँछिन् ।
यो खबर पढेर तपाईलाई कस्तो महसुस भयो ?
प्रतिक्रिया