एक महिनामा त्रिभुवन विमानस्थलबाट साढे ७ लाख यात्रुले लिए सेवा

काठमाडौं । त्रिभुवन अन्तर्राष्ट्रिय विमानस्थलले अक्टोबर २०२५ मा ७ लाख ६१ हजार ४१४ भन्दा बढी यात्रुलाई सेवा दिएको छ । मुख्य चाडवाड दशैं–तिहारको समयमा विमानस्थलमा यातायात बढ्ने गर्छ ।

आन्तरिक उडानतर्फ यस महिनामा ३ लाख २३ हजार १२ यात्रु सेवा लिएका छन् । यसमध्ये २ लाख ४ हजार ५८८ यात्रु काठमाडौंबाट उडेका थिए भने १ लाख १८ हजार ४२४ यात्रु काठमाडौं आएका छन् । काठमाडौंबाट ४ हजार २०९ उडान र ४ हजार २०८ अवतरण भएको छ । कुल मिलाएर आन्तरिक उडान–अवतरण ८ हजार ४१७ पुगेको छ ।

अन्तर्राष्ट्रिय उडानतर्फ, अक्टोबरमा १ लाख ९५ हजार ८७६ यात्रु नेपालबाट विदेश उडेका थिए भने २ लाख ४० हजार ३९४ यात्रु विदेशबाट नेपाल आएका छन् । यसरी कुल ४ लाख ३८ हजार ४०६ अन्तर्राष्ट्रिय यात्रु भएको छ ।

त्यसैगरी, २ हजार १३६ यात्रुले त्रिभुवन विमानस्थलमा ट्रान्जिट सुविधा प्रयोग गरेका छन् । यस महिनामा अन्तर्राष्ट्रिय उडान–अवतरण १ हजार ५८५–१ हजार ५८५ गरी कुल ३ हजार १७० पुगेको तथ्यांक विमानस्थलले सार्वजनिक गरेको छ । नेपालमा ३१ अन्तर्राष्ट्रिय उडान कम्पनीले सेवा प्रदान गरेका थिए ।

त्रिभुवन विमानस्थलको तथ्यांक अनुसार, अक्टोबर महिनामा विमानस्थल उच्च क्षमतामा सञ्चालन भएको छ र मुख्य चाडवाडका अवसरमा यात्रुको संख्या उल्लेखनीय वृद्धि भएको देखिन्छ ।