काठमाडौं । अमेरिकी राष्ट्रपति डोनाल्ड ट्रम्पले टेनेसी राज्यको डेमोक्र्याटिक नेतृत्वको शहर मेम्फिसमा राष्ट्रिय गार्ड तैनाथ गर्ने ज्ञापनपत्रमा हस्ताक्षर गरेका छन् ।
ह्वाइट हाउस ओभल अफिसमा हस्ताक्षर गरिएको उक्त निर्णयले हिंसात्मक अपराध नियन्त्रणमा संघीय सरकार प्रत्यक्ष रूपमा संलग्न हुने भएको छ ।
ज्ञापनपत्रअनुसार, मेम्फिसमा हिंसात्मक अपराधको स्तर अत्यधिक रहेको र यसले स्थानीय सरकारको प्रभावकारी प्रतिक्रिया क्षमतामा असर पारेको भन्दै संघीय हस्तक्षेप आवश्यक भएको उल्लेख छ । हालैका महिनामा मेम्फिस लस एन्जलस र वाशिंगटन डीसीपछि सडकमा राष्ट्रिय गार्ड तैनाथ हुने तेस्रो अमेरिकी शहर बनेको हो ।
सडक अपराध अन्त्य गर्न ‘मेम्फिस सुरक्षित कार्यदल’ गठन गरिएको छ । यस कार्यदलले टेनेसी, मेम्फिस र छिमेकी क्षेत्राधिकारका राज्य तथा स्थानीय अधिकारीहरूसँग नजिकबाट समन्वय गर्दै जानकारी आदान–प्रदान, संयुक्त प्राथमिकता निर्धारण र सार्वजनिक सुरक्षा पुनःस्थापना गर्ने लक्ष्य लिएको छ ।
संघीय अनुसन्धान ब्युरोका तथ्याङ्कअनुसार सन् २०२४ मा मेम्फिसमा देशकै सबैभन्दा उच्च हिंसात्मक अपराध दर थियो । हत्या, डकैती, बढ्दो आक्रमण र सम्पत्ति अपराधको दरसमेत मेम्फिसमा राष्ट्रिय औसतभन्दा धेरै भएको ह्वाइट हाउसले जनाएको छ ।
टेनेसी राज्य रिपब्लिकन पार्टीको नियन्त्रणमा भए पनि मेम्फिस शहर डेमोक्र्याटिक नेतृत्वमा रहेको छ र त्यहाँ बहुसंख्यक अश्वेत जनसंख्या छ । ट्रम्पले मेम्फिसपछि आवश्यक परे अन्य शहरहरूमा समेत राष्ट्रिय गार्ड पठाउने संकेत गरेका छन् ।
यो खबर पढेर तपाईलाई कस्तो महसुस भयो ?
प्रतिक्रिया