काठमाडौं । चन्द्रागिरि केबलकार दसैँ अगाडि नै पुनः सञ्चालनमा ल्याउने तयारी गरिएको छ । प्रदर्शनमा क्रममा तोडफोड भएर बन्द भएको केबलकार दसैँ अगाडि नै सञ्चालनमा ल्याउने तयारी गरिएको हो ।
गत भदौ २३ र २४ गते देशभर भएको जेनजीको विरोध प्रदर्शनका क्रममा चन्द्रागिरि हिल्सको केबलकारमा पनि आगजनी र तोडफोड भएको थियो । प्रदर्शनकारीले केबुलकारको तार र गोन्डलामा आगजनी र तोडफोड गरी क्षति पुराएका थिए । आगजनीले तारमा समेत क्षति पुगेको हुनसक्ने भएकाले तत्कालका लागि केबलकार बन्द गरिएको छ ।
केबलकारको बटम स्टेसनमा क्षति पुगेको कारण सुरुमा बटम स्टेसनको सरसफाइ गरिएको छ । त्यसपछि केबलकारको भौतिक क्षतिको अवलोकन गरी शीघ्र सञ्चालनको तयारी गरिएको चन्द्रागिरि केबलकारले जनाएको छ । चन्द्रागिरि हिल्सका अनुसार आगजनीले केबुलकारका तारहरू तातो भएर जलेको वा काम नगरेको हुनसक्ने भएकाले अस्ट्रियाबाट नै प्राविधिक बोलाएर चेकजाँच गरिन लागेको छ ।
अन्य कुनै खराबी छ कि छैन भनेर हेर्न र सुक्ष्मरुपमा सुरक्षा सतर्कता अपनाउनु भएकाले पर्यटकको सुरक्षा र सुविधालाई ध्यानमा राखी पूर्णरुपमा सुरक्षित रहेको निश्चित भएपछि मात्रै सञ्चालनमा ल्याउन लागिएको हो । चन्द्रागिरि हिल्स व्यवस्थापनका अनुसार दसैँ अगाडि केबुलकारको मर्मतको लागि अस्ट्रियाका प्राविधिक तथा विशेषज्ञहरू ल्याएर आवश्यक जाँच र मर्मत गरिँदै छ ।
दसैँमा भालेश्वर मन्दिरको दर्शन गर्न जाने र दसैँका छुट्टीमा धेरै पर्यटकहरू चन्द्रागिरि हिल्स जाने भएकाले दसैँ अगाडि नै सबै प्राविधिक पक्षको परीक्षण गरी सुरक्षाको सुनिश्चित गर्ने बताइएको छ ।
आगजनीबाट चन्द्रागिरि हिल्सको बटम स्टेसनमा कम्तीमा डेढ करोड रुपैयाँको क्षति भएको छ ।
यो खबर पढेर तपाईलाई कस्तो महसुस भयो ?
प्रतिक्रिया