कास्की, चितवन र म्याग्दी कारागारबाट फरार आठ कैदी पक्राउ

 बागलुङ । जिल्ला प्रहरी कार्यालय बागलुङले विभिन्न कारागार र बालसुधारगृहबाट फरार भएका आठ जना थुनुवा तथा कैदी बन्दीलाई पक्राउ गरेको छ ।

प्रहरीले बालसुधार केन्द्र सराङकोट, चितवन कारागार, पोखरा कारागार, म्याग्दी कारागार र केन्द्रीय कारागारबाट फरार भएका बन्दी तथा थुनुवालाई नियन्त्रणमा लिएको हो ।

जिल्ला प्रहरी कार्यालयका प्रहरी नायब उपरीक्षक वसन्त पाण्डेका अनुसार, बालसुधार केन्द्र सराङकोटबाट चार जना फरार भएका थिए भने चितवन, पोखरा, म्याग्दी र केन्द्रीय कारागारबाट एक/एक जना फरार भएका थिए । पक्राउ परेकामध्ये अधिकांशलाई मालढुङ्गा चेकपोष्टबाट र केहीलाई घरबाट नियन्त्रणमा लिएको छ ।

पक्राउ परेकामध्ये चार कैदी र चार जना थुनुवा छन् । उनीमध्ये छ जना जबरजस्ती करणीका आरोपी र दुई जना ज्यान मुद्दाका आरोपी रहेका छन् । केही पक्राउ परेकालाई सम्बन्धित कारागारमा पठाइएको छ भने केहीलाई बागलुङमै राखिएको छ ।

प्रहरी नायब उपरीक्षक पाण्डेले भने, ‘जेनजी प्रदर्शनका क्रममा कारागारबाट धेरै कैदीबन्दी फरार भएका थिए, हामी फरार भएका व्यक्तिहरूलाई बागलुङबाट पनि पक्राउ गरिरहेका छौँ ।’