निरन्तरको प्रहारपछि डा. लेखजंग थापा : सम्बन्ध विच्छेदपछि दोस्रो विवाह, सन्तानको खुसीका लागि मित्रवत् सम्बन्ध 

काठमाडौं । आगामी कात्तिक १७ गते हुन गइरहेको रुपन्देही–३ को प्रतिनिधिसभा उपनिर्वाचनका लागि राष्ट्रिय स्वतन्त्र पार्टीबाट उम्मेदवार घोषित डा. लेखजंग थापाले मंगलबार एक विज्ञप्तिमार्फत आफूमाथि पछिल्ला दिनमा भइरहेका प्रहारको जवाफ फर्काएका छन् । 

आफूमाथि लागेका आरोपको सामाजिक सञ्जालमार्फत खण्डन गरेका उनले आफूले दुई वटा विवाह गरेको भएपनि पनि पहिलो विवाहको सम्बन्ध दिगो नभएको र सम्बन्ध विच्छेदपछि अर्को विवाह गरेको प्रष्टीकरण दिएका छन् । तर पूर्वपत्नीसँग पनि सन्तानको भविष्यका लागि आफ्नो सम्बन्ध राम्रो भएको उनले जनाएका छन् । उनले सम्बन्ध विच्छेदको कानुनी प्रमाण पनि पेस गरेका छन् ।

उनले भनेका छन्, ‘एउटा व्यक्तिको जीवनमा परिस्थितिजन्य धेरै कुराहरू हुन्छन् । व्यक्तिको नियत के कुरामा भर पर्छ भने उसले त्यस्ता कुराहरूलाई लुकाउँछ वा पारदर्शी भएर सम्बन्धित सबैलाई भन्दछ । परिस्थितिका कारण मैले जीवनमा दुई पटक बिहे गरेको कुरा जति सत्य हो त्यति नै सत्य मेरो एकजना श्रीमतीसँगको सम्बन्ध विच्छेद पनि हो र त्योभन्दा ठूलो सत्य सम्बन्ध विच्छेद भएकी मेरी श्रीमतीसँगको मेरो सन्तान हो जसको म बाबा पनि हो । मेरो निजी जीवनको यो आयामबारे मैले पार्टीलाई जानकारी दिएको र पार्टी नेतृत्वले लिएको कानुनी परामर्श समेतलाई उम्मेदवार छनोट प्रक्रियामा संलग्न गरिएको मेरो बुझाइ छ । एउटा कालखण्डमा जीवन बिताउने वाचा गरेका सम्बन्धहरू कुनै कारणले टुट्दै गर्दा त्यसपछाडिको सम्बन्ध तितो हुनुपर्छ भन्ने मलाई लाग्दैन । दुई व्यक्तिहरू असल हुँदाहुँदै पनि कहिलेकाहीँ सम्बन्धहरू टुट्छन् ।  तर ती टुटेका सम्बन्धहरूले बच्चाहरूको जीवन बर्बाद हुनु हुँदैन भन्ने मेरो लागि सबैभन्दा महत्वपूर्ण कुरा हो । न्युरोचिकित्सकका  रूपमा १४ वर्ष लामो मेरो  यात्रामा मैले हजारौँ बालबालिकाहरूलाई नजिकबाट नियालेको छु र एउटा परिवार बिग्रँदा उनीहरूको सुषुप्त बाल मनोविज्ञानमा पर्ने असर महसुस गरेको छु । यसका आधारमा पारिवारिक सम्बन्धको असर  बच्चामा  पर्नु हुँदैन भन्ने कुरामा म सचेत छु । सन्तानको भविष्यका लागि उसलाई जन्म दिने आमासँग मिलेर साझा अभिभावकत्व दिनका लागि यदि मेरो सम्बन्ध सौहार्दपूर्ण छ र त्यो यदि मेरो गल्ती हो भने मलाई त्यसमा ग्लानि छैन ।’

उनले यो विषयमा थप भनेका छन्, ‘सम्बन्ध विच्छेद भन्ने बित्तिकै के एकअर्कालाई गाली गर्नै पर्ने हो, के अर्काको अस्तित्व स्वीकार्न नहुने हो, के एकअर्कासँग भेट्नै नहुने हो वा ऊसँग मित्रभाव राख्नै नहुने हो ? यदि मेरो छोराले उसको बाबाको सम्बन्ध आमासँग सुमधुर होस् भन्ने चाहन्छ भने ऊ नाबालिग हुँदासम्म मात्र होइन म  बाँचुन्जेल सम्बन्धको त्यो पक्ष दरिलो बनाउन चाहन्छु । त्यसमा मलाई कसैको अनुमति लिनु पर्दैन ।’

रास्वपाले उनलाई उम्मेदवार बनाएपछि पछिल्ला दिनमा उनको व्यक्तिगत जीवन, विशेषगरी ‘बहुविवाह’ लाई लक्षित गरी उनीमाथि निरन्तर प्रहार गरिएको छ । उनका पूर्व र हालकी श्रीमती दुवैको तस्बिर राखेर पनि उनीमाथि आक्रमण भइरहेको छ । 

रास्वपाले ‘प्राइमरी इलेक्सन’ बाट अन्तिममा आफ्नो नाम छनौट गरेपछि खुसी भएका उनले रुपन्देही–३ मा बस्दै आएकी ९६ वर्षीया बुढी आमालाई भेटेर आशीर्वाद लिने मन भएको भएपनि आफ्नो चरित्रलाई लिएर प्रहार हुन थालेपछि आशीर्वाद लिन नसकेकोमा उनले चित्त दुखाएका छन् । 

उनले भनेका छन्, ‘ रुपन्देही– ३ मा  ९६ वर्षकी मेरी बुढी आमा बस्नुहुन्छ, पहिलो फ्लाइट लिएर आमालाई आफू उम्मेदवार भएको खुसी  बाँडेर  आशीर्वाद लिने मन थियो । सोचेको थिएँ एउटा चिकित्सकका रूपमा मैले गर्न खोजेका सत्कर्मका कुराहरू हेडलाइन बन्छन् होला र म आमालाई त्यही कुराहरू देखाएर राजनीति अब सङ्लो हुन्छ है, परिवर्तनको छनक हजुरले आफ्नै पालामा देख्नुहुन्छ है भनेर विश्वास दिलाउँछु । खैर जिन्दगी सोचे जस्तै कहाँ हुन्छ र  मलाई आशीर्वाद दिन भैरहवामा मेरी आमा मलाई कुर्दै गर्दा म काठमाडौंमा मेरो निजी जीवनमाथि प्रश्न गर्नेहरू लाई उत्तर  दिँदैछु । प्रश्न  गर्ने सबै जनालाई  हेक्का होस्, मेरो पारिवारिक जीवन न गैरकानुनी छ, न समस्यापूर्ण। म व्यक्ति लेखजङ थापामाथि आक्रमण भएको भए सायद म जवाफ पनि दिन्थिन होला । तर मैले बुझेको छु यो आक्रमण ममाथि होइन, यो बेथिति र विसङ्गतिमा रमाउनेहरू बाट समाजलाई कञ्चन बनाउन सुसंस्कृत राजनीति गर्ने राष्ट्रिय स्वतन्त्र पार्टीमाथि भएको सुनियोजित आक्रमण हो । त्यसैले मैले आफ्नो वैयक्तिक कुराहरू पनि राख्नुपर्छ ।’

यी कुरा मार्फत आफ्ना कुरा भन्न थालेका डा. थापाले विज्ञप्तिको बीचतिर भनेका छन्, ‘राष्ट्रिय स्वतन्त्र पार्टीका साथीहरू, मेरो व्यावसायिक र सामाजिक जीवन खुला किताबझैँ सार्वजनिक छ । पेसागत सफलताले पूर्ण सन्तुष्ट भएपनि नागरिकका रूपमा म देशमा झाँगिँदै गएको विकृतिबाट असन्तुष्ट भएर राजनीतिमा आएको हुँ । देश निर्माणमा योगदान दिन सक्छु भनेर कुनै कालखण्डमा एउटा पार्टीसँगको मेरो आबद्धतालाई कानुनी विधि अनुसरण गरी टुङ्ग्याएर राष्ट्रिय स्वतन्त्र पार्टीको साधारण सदस्य बनेको हुँ ।  मेरो यात्रा औसत राजनीतिभन्दा माथि   रूपान्तरणकारी परिवर्तनका लागि हो । विराट लक्ष्य लिएर  हिँडेको व्यक्ति यस्ता कुनै खाले आक्रमणबाट डराउनु हुँदैन, तर मेरो व्यक्तिगत कारणले पार्टीमाथि सानो दाग पनि लागोस् भन्ने  म किञ्चित चाहन्न । म  नेता बन्न होइन, देश बदल्ने अभियानको सहयात्री बन्न आएको हुँ । त्यो रूपान्तरणमा म बल हुन चाहन्छु, कमजोरी होइन । यो देशमा कति ठूलो राजनीतिक सुनामी आउँदै छ रुपन्देहीले सुनाउँदै छ ।  कसले भन्यो रुपन्देही –३ को उम्मेदवार म हो भनेर ? रुपन्देही –३ को उम्मेदवार त पुनम, जेबी, रचना, सुलभ, ज्ञानु, मधु, पार्थिवेन्द्र, कुसुम अनि यो देशलाई माया गर्ने सबै नेपाली हो । अस्ति नक्खु कारागारमा  सभापतिले  हामी सबैलाई भन्नुभएको कुरा म अहिले सम्झिरहेको छु । तपाईँहरु उम्मेदवार हुनुहोस्  मेरो शुभकामना छ, यदि  बन्नुभएन भने पनि यो देश  एउटा सौम्य र शान्तिपूर्ण क्रान्तिका लागि अब तयार छ र  तपाईँहरू त्यसको संवाहक बन्नुपर्छ ।’

उनले थप भनेका छन्, ‘म त्यही यात्रामा अगाडि बढेको  छु । रूपान्तरणको सुनामी ल्याउन हिँडेको मान्छे जस्तोसुकै  त्यागका लागि पनि तयार छ । नेपालकै राजनीतिक इतिहासमा अभूतपूर्व अभ्यास मानिएको ‘उम्मेदवार छनोट विधि’ अन्तर्गत ३५ दिन लामो बहुआयामिक प्रक्रियाबाट छनोट भई उम्मेदवार घोषित भएको तथ्य अवगत नै छ ।  तथापि मेरो पार्टीले गर्ने कुनै पनि निर्णयलाई म सहर्ष स्वागत, स्वीकार र पालना गर्नेछु ।’