उपमेयर डंगोलद्वारा महानगर प्रहरीलाई ‘संस्थाको प्रतिनिधि’ भएर काम गर्न सुझाव

काठमाडौं । काठमाडौं महानगरपालिकाकी उपमेयर सुनिता डंगोलले महानगर प्रहरीलाई व्यक्तिको नभई संस्थाको प्रतिनिधि भएर काम गर्न सुझाव दिएकी छन् ।

शनिबार काठमाडौंमा आयोजित ३३औँ महानगर प्रहरी दिवसको अवसरमा उपमेयर डंगोलले महानगर प्रहरी मेयर बालेन्द्र साहको निर्देशनअनुसार मात्रै चल्ने अभ्यासमा सुधार गर्नुपर्ने कुरामा जोड दिइन् । 

उनले फिल्डमा खटिँदा आफ्नो भूमिका व्यक्तिगत नभई संस्थाको र कानुनी शासनको प्रतिनिधित्व हो भन्ने स्पष्ट गर्न प्रहरीलाई आग्रह गरिन् ।

उपमेयर डंगोलले भनिन्, ‘सदैव यहाँहरुले बर्दी लगाएर फिल्डमा गईरहनु हुँदा म कोही व्यक्तिको प्रतिनिधि होइन, म संस्थाको प्रतिनिधित्व गर्छु, म कानुनी शासनको प्रतिनिधित्व गर्छु भन्ने कुरा स्थापित गर्न सक्नुहोस्।

साथै उनले काठमाडौं महानगरपालिकामा सुशासन स्थापनाका लागि नगर प्रहरी आफैँ उदाहरण बन्नुपर्ने पनि जोड दिइन्।