‘अदालतलाई झोक चल्दा प्रधानमन्त्री समेत बर्खास्ती र नियुक्ति गर्दा रहेछन्’

काठमाडौं । प्रधानमन्त्री केपी शर्मा ओलीले अदालतलाई झोक चले गरेर प्रधानमन्त्री बर्खास्ती र नियुक्ति गर्ने गरेको टिप्पणी गरेका छन् ।

मंगलबार राष्ट्रिय सूचना आयोगले आयोजना गरेको १९औँ राष्ट्रिय सूचना दिवसलाई सम्बोधन गर्दै उनले यस्तो धारणा राखेका हुन् ।

उनले प्रधानमन्त्री संसदबाट चुनिने भएकाले अदालतको विषय नरहेको स्पष्ट पारे । ‘प्रधानमन्त्री संसदबाट चुनिन्छ, संसदले हटाउँछ । तर कहिलेकाहीँ अदालतलाई झोक चल्दा प्रधानमन्त्री बर्खास्ती वा नियुक्ति गरिदिन्छ, त्यो पनि हाम्रो ताजै अनुभव हो, ‘प्रधानमन्त्री ओलीले भने ।

संविधानको व्याख्या गर्ने अधिकार अदालतलाई भए पनि त्यसलाई अनुकूल व्याख्या गर्ने सुविधाको रूपमा प्रयोग गर्दा यस्तो अवस्था आएको उनको भनाइ छ । उनले आफूले अदालतको हुर्मत लिएको नभई व्यक्तिगत अनुभव प्रस्तुत मात्र गरेको बताए ।

प्रधानमन्त्री ओलीले लोकतन्त्रलाई अझै सबल बनाउन आवश्यक रहेको उल्लेख गर्दै भने, ‘हामी पूर्ण लोकतन्त्रमार्फत परिपूर्ण लोकतन्त्रतर्फ अघि बढिरहेका छौँ, जसअन्तर्गत सबै स्वतन्त्रताको हक सुनिश्चित हुन्छ ।’