पाकिस्तानमा वर्षाजन्य विपत्ति : ४८ घण्टामा २२५ को मृत्यु

काठमाडौं । पाकिस्तानको उत्तरपश्चिमी खैबर पख्तुनख्वा प्रान्तमा विगत ४८ घण्टामा वर्षासँग सम्बन्धित विभिन्न दुर्घटनामा २ सय २५ जनाको मृत्यु भएको छ ।

राष्ट्रिय विपद् व्यवस्थापन प्राधिकरण (एनडीएमए) का अनुसार, जुन २६ मा मनसुन सुरु भएदेखि हालसम्म मृत्यु हुनेको संख्या ५ सय ४१ पुगेको छ ।

उद्धार संस्थाहरूले दिएको जानकारीअनुसार मुसलधारे वर्षा, आकस्मिक बाढी र चट्याङका कारण प्रान्तका धेरै भागमा ठूलो विनाश भएको छ । बाढीले धेरै गाउँ डुबानमा परेका छन् भने केही परिवारका सम्पूर्ण सदस्य बेपत्ता भएका छन् ।

निरन्तर वर्षाबाट पहिरो समेत खस्दा प्रमुख सडक अवरुद्ध भएका छन् र दुर्गम क्षेत्रहरूको सम्पर्क विच्छेद भएको छ ।

सुरक्षाका लागि नागरिकलाई सावधानी अपनाउन, जोखिमपूर्ण क्षेत्रतर्फ अनावश्यक यात्रा नगर्न तथा सतर्क रहन आग्रह गरिएको छ । विशेष गरी पर्यटकलाई आगामी पाँचदेखि छ दिनसम्म उत्तरी क्षेत्रको भ्रमण नगर्न सल्लाह दिइएको छ ।