काठमाडौं । नेपाल उद्योग वाणिज्य महासंघका अध्यक्ष चन्द्रप्रसाद ढकालले निजी क्षेत्रप्रति आम नागरिकको दृष्टिकोण परिवर्तन गर्नुपर्ने बताएका छन् ।
राजधानीमा आइतबार आयोजित एक कार्यक्रममा अध्यक्ष ढकालले निजी क्षेत्रले गरेको योगदानलाई जनतामाझ सकारात्मक तरिकाले प्रस्तुत गर्नुपर्ने बताएका हुन् ।
उनका अनुसार हाल जनतामा निजी क्षेत्रप्रति राम्रो छाप नपरेको अवस्थामा रोजगारी सिर्जना, राजस्व वृद्धि र पूर्वाधार विकास गर्न कठिन हुने अवस्था छ । उनले भने, ‘जबसम्म आम मानिसमा निजी क्षेत्रले गरेका योगदानलाई सकारात्मक हिसाबले बुझाइँदैन, तबसम्म रोजगारी सिर्जना, राजस्व वृद्धि र पूर्वाधार विकास असम्भव छ ।’
अध्यक्ष ढकालले सरकारले रोजगार सिर्जना गर्न कठिनाइ रहेको तर निजी क्षेत्रले एउटा उद्योग स्थापना गरेपछि त्यसले तत्काल हजारौँलाई रोजगार दिन सक्ने उल्लेख गरे । उनले निजी क्षेत्रलाई प्राथमिकता दिनुपर्नेमा जोड दिँदै भने, ‘सरकारले रोजगार सिर्जना गर्न धेरै गाह्रो छ, तर निजी क्षेत्रले कुनै एउटा उद्योग प्रतिष्ठान खोलेको खण्डमा हजारौँलाई तुरुन्तै रोजगार दिन सक्ने क्षमता राख्छ । त्यस कारण निजी क्षेत्रलाई प्राथमिकता दिनुपर्छ ।’
उनले निजी क्षेत्रलाई लिएर सरकारले पनि दृष्टिकोण परिवर्तन गर्दै आएको र केही कानुन संशोधन गरेर निजी क्षेत्रमैत्री वातावरण बनाएको जानकारी दिएका छन् ।
यसरी निजी क्षेत्र र सरकारबीच सहकार्यले देशमा रोजगार र आर्थिक विकासलाई थप गति दिने आशा गरिएको छ ।
यो खबर पढेर तपाईलाई कस्तो महसुस भयो ?
प्रतिक्रिया