नाइमा अटो शोमा दर्शकको भीड : आकर्षणको केन्द्रमा महिन्द्राको बी-सिक्स ईभी

लोकपथ

२०८२,श्रावण,२२,बिहीवार १८:४०

861

काठमाडौं । नाइमा नेपाल मोबिलिटी एक्स्पो २०२५ हिजोदेखि काठमाडौंको भृकुटीमण्डपमा सुरु भएको छ। एक्स्पोको दोस्रो दिन आज ठूलो संख्यामा दर्शक तथा ग्राहकहरूको उपस्थिति देखिएको छ।

नाइमाका परामर्शदाता प्रतिक अर्यालका अनुसार, पहिलो दिनमै करिब १५ हजार जनाको उपस्थिति भएको थियो भने दोस्रो दिन दिउँसोको मध्य समयमै १५ हजारभन्दा धेरै आगन्तुक एक्स्पोमा भित्रिइसकेको अनुमान गरिएको छ।

भीडको चापका कारण आयोजकले समय तालिकामा समेत लचिलोपन अपनाएको छ। अर्यालले भने, ‘हामीले बेलुका ६ बजेसम्म मात्र टिकट खुला राख्ने योजना बनाएका थियौं, तर हिजोको अपेक्षा भन्दा बढी भीडको अनुभवका आधारमा आज टिकट समय एक घण्टा बढाएर ७ बजेसम्म खुला राख्ने निर्णय गरेका छौँ।’ जसले गर्दा कार्यालय सकेर आउने ग्राककहरुले शो काे भ्रमण गर्न सक्नेछन् ।

५० भन्दा बढी अटो ब्रान्डहरूको सहभागिता रहेको यस एक्स्पोमा महिन्द्राका दुई नयाँ इलेक्ट्रिक सवारी मोडेलले सबैभन्दा धेरै ध्यान तानेका छन् । महिन्द्रा बी-सिक्स ईभी (B-Six EV) र महिन्द्रा एक्सभी ९ (XV9) लाई अग्नि ग्रुपले नेपालमा पहिलो पटक सार्वजनिक गरेको हो ।

अग्नि ग्रुपका सेल्स म्यानेजर सागर भट्टराईका अनुसार, आगन्तुकहरू विशेष गरी B-Six EV मा आकर्षित भएका छन्, जुन आधुनिक प्रविधि, स्टाइलिस डिजाइन र नेपालको सडक अनुकूलित विशेषतासहित आएको छ।