प्रतिनिधिसभाको बैठक बस्दै, संशोधन विधेयक र प्रतिवेदन पेस हुने

काठमाडौं । संघीय संसद् प्रतिनिधिसभाको बैठक आज अपराह्न १ बजे नयाँ बानेश्वरस्थित संसद् भवनमा बस्दैछ। बैठकमा विभिन्न महत्वपूर्ण विधेयक र प्रतिवेदनहरूमाथि छलफल हुने कार्यसूची रहेको छ।

आजको बैठकमा संघीय संसद्का महासचिवले ‘संवैधानिक परिषद् (काम, कर्तव्य, अधिकार र कार्यविधि) सम्बन्धी पहिलो संशोधन विधेयक, २०७९’ मा राष्ट्रपतिबाट प्राप्त सन्देशको जानकारी गराउने कार्यक्रम छ।

लेखा समितिका सभापति ऋषिकेश पोखरेलले ‘सार्वजनिक लेखा समितिको ३२औँ वार्षिक प्रतिवेदन, २०८२’ मा उल्लिखित सुझावहरूलाई आर्थिक कार्यविधि तथा वित्तीय उत्तरदायित्व ऐन, २०७६ को दफा ४१ को उपदफा २ बमोजिम स्वीकृति दिन प्रस्ताव प्रस्तुत गर्नेछन्।

त्यसैगरी, युवा तथा खेलकूदमन्त्री तेजुलाल चौधरीले ‘राष्ट्रिय खेलकुद विकास (पहिलो संशोधन) विधेयक, २०८२’ माथि विचार गरियोस् भन्ने प्रस्ताव राख्ने छन्। उद्योग, वाणिज्य तथा आपूर्तिमन्त्री दामोदर भण्डारीले ‘विश्व व्यापार संगठनको मत्स्य उद्योगमा सहुलियतसम्बन्धी सम्झौता’ अनुमोदन गर्न प्रस्ताव पेस गर्ने कार्यक्रम पनि बैठकको कार्यसूचीमा रहेको छ।