काठमाडौं । बागमती प्रदेशका मुख्यमन्त्री बहादुर सिंह लामाले आफूले राजीनामा नदिने अडान कायम राखेका छन् ।
लामाले आफूले संसदीय दलको नेतामा पराजित भए पनि राजीनामा दिनुपर्ने कुनै आधार र कारण नभएको जिकिर गरे ।
यसअघि मंगलबार नै लामालाई बागमती प्रदेश कांग्रेस संसदीय दलले संसदीय दलको नेताबाट हटाएको थियो । आज पुनः संसदीय दलको नेता चयनका लागि निर्वाचन भयो । तर लामा पराजित हुन पुगे ।
पराजित भएपछि लामाले सञ्चारकर्मीहरुसँग कुरा गर्दै आफूले राजीनामा नदिने बताए ।
उनले भने, ‘राजीनामा दिनुपर्ने कुनै आधार छैन । हामी संविधान अनुसार चल्ने हो ।’
त्यस्तै आफू संविधानको धारा १६२ अनुसार मुख्यमन्त्री बनेको र त्यहाँ मुख्यमन्त्री संसदीय दलको नेता हुनुपर्ने कुनै विषय नरहेको समेत दाबी गरेका छन् ।
आज भएको संसदीय दलको निर्वाचनमा लामाले १५ मत मात्रै प्राप्त गरेका थिए । उता कांग्रेस बागमती प्रदेशभा सभापति समेत रहेका प्रदेश सांसद इन्द्रबहादुर बानियाँले २१ मत प्राप्त गरेका थिए । बागमतीमा कांग्रेसको कुल ३७ सिट रहेको छ । सबै मत खसे पनि एक मत बदर हुन पुगेको थियो ।
त्यसो त ०८१ साल पुस १३ गते भएको बागमती प्रदेश कांग्रेस संसदीय दलको निर्वाचनमा लामाले बानियाँलाई हराएका थिए ।
यो खबर पढेर तपाईलाई कस्तो महसुस भयो ?
प्रतिक्रिया