भेरी नदीमा टिपर खस्दा तीन जना बेपत्ता, खोजी कार्य जारी

काठमाडौं । गए राति भेरी नदीमा टिपर खस्दा तीन जना बेपत्ता भएका छन् । 

जाजरकोटको नलगाड नगरपालिकाको दल्लीबाट जाजरकोटकै रिम्नातर्फ आउँदै गरेको भेरी करिडोरको काम गर्दै आएको यती विल्डर्सको रा१क १५०१ नम्बरको टिपर रुकुमपश्चिमको आठबीसकोट–१४ पिपलचौरस्थित भेरी नदीमा खसेको हो ।

उक्त टिपरमा चालकसहित तीन जना सवार रहेका थिए । उनीहरुको अवस्था अज्ञात रहेको प्रहरीले जनाएको छ । 

बेपत्ताको खोजीमा रुकुमपश्चिम र जाजरकोटको प्रहरी टोली परिचालन गरिएको छ । तर भेरी नदीमा पानीको मात्रा अत्यधिक भएकाले बेपत्ताको खोजी गर्न कठिनाइ भइरहेको प्रहरीको भनाइ छ । दुर्घटनामा परेकाहरूको नाम र ठेगाना खुल्न सकेको छैन । खोज तथा उद्धार कार्य जारी रहेको प्रहरीले जनाएको छ ।