काठमाडौं । लामो समयदेखि बेलायमा बस्दै आइरहेका राजेन्द्र पुडासैनीले एनआरएन यूके (बेलायत) को अध्यक्षका लागि उम्मेदवारी घोषणा गरेका छन् ।
पुडासैनीले सन् २०२५–२७ कार्यकालको लागि नेतृत्वको आकांक्षा राख्दै उनले आगामी जुलाई २६ मा हुने निर्वाचनमा प्रतिष्पर्धा गर्ने घोषणा गरेका हुन् ।
उनले नेपाली नागरिकताको निरन्तरता, विदेशमा रहेका नेपाली सम्पत्तिको सुरक्षा, गोर्खा सैनिकको समानताका लागि ऐक्यवद्धता, नयाँ पुस्ताको सहभागिता, नेपाली कला संस्कृतिको प्रवर्द्धन, विद्यार्थी तथा श्रमिक अधिकारको संरक्षणलगायतका एजेन्डालाई
प्रमुख प्राथमिकता दिने बताएका छन् ।
‘एनआरएन अभियानलाई एकतामा बाँध्न सके, जटिल लाग्ने मुद्दासमेत समाधान गर्न सकिन्छ,’ उनि भन्छन् ।
नेपालको नुवाकोटबाट २५ वर्षअघि बेलायत गएका पुडासैनी हाल लन्डनमा बसोबास गर्छन् ।
उनी बेलायतको प्रतिष्ठित विश्वविद्यालयबाट एमबीए तथा बीएस्सी अनर्स गरेर हाल १५ वर्षदेखि एनएचएस (नेशनल हेल्थ सर्भिस) मा कार्यरत छन् । विद्यार्थी जीवनदेखि नै नेतृत्वदायी भूमिकामा रहेका उनले नेपालमा सरस्वती बहुमुखी क्याम्पसको स्वतन्त्र विद्यार्थी युनियन (स्ववियु) सभापति भएर काम गरेका थिए।
बेलायतमा पनि उनी ट्रेड युनियन आन्दोलनमा अग्रपंक्तिमा छन् । हाल जीएमबी नेशनल युनियन लन्डन सेन्टर नर्थका सचिव रहेका पुडासैनी यती नेपाली एशोसिएसन यूकेका पूर्व महासचिव र प्रवासी नेपाली मञ्च बेलायतका अध्यक्षसमेत रहिसकेका छन् । एनआरएनए अन्तर्राष्ट्रिय समिति सदस्यको रूपमा पनि उनले कार्यकाल बिताइसकेका छन् ।
‘मलाई विश्वास छ, नेपाली समुदायलाई एकताबद्ध बनाउने प्रयासमा मेरो यात्राले सार्थकता पाउनेछ,’ पुडासैनी भन्छन् ।
यो खबर पढेर तपाईलाई कस्तो महसुस भयो ?
प्रतिक्रिया