रास्वपालक्षित बर्तौलाको टिप्पणी : ‘संसदलाई दुषित समाचार सम्प्रेषणको स्रोत बनाउन खोजियो’

काठमाडौं । नेकपा (एमाले)का प्रमुख सचेतक महेश बर्तौलाले संसदलाई दुषित समाचार सम्प्रेषणको स्रोत बनाउन खोजिएको टिप्पणी गरेका छन् ।

प्रतिनिधि सभाको बुधबारको बैठकमा बोल्दै बर्तौलाले रास्वपा सांसदहरूलाई लक्षित गर्दै यस्तो टिप्पणी गरेका हुन् । केही सांसदहरूले संसदजस्तो गम्भीर स्थानलाई व्यक्तिगत फाइदाका लागि प्रयोग गर्न खोजेको उनको आरोप छ ।

उनले संसदभित्र गैरजिम्मेवार अभिव्यक्ति र हावादारी गतिविधिबाट संस्थागत मर्यादामा आघात पुगेको बताउँदै त्यसप्रति गम्भीर हुन संसद र सभामुखको ध्यानाकर्षण गराए ।

उनले भने, ‘यो संसदमा आफ्नो व्यक्तिगत फाइदाका लागि केही सांसदहरुले गलत कुरा व्यक्त गरिरहनु भएको छ । भाइरल बन्नको लागि संसदको ठाउँमा हावादारी र जथाभावी क्रियाकलापहरु गरेर दुषित समाचार सम्प्रेषणको स्रोत संसद बनाउन खोजिँदैछ ।यसतर्फ सभामुखमार्फत म सिंगो हाउसको पनि ध्यानाकर्षण गराउन चाहन्छु ।’ संसदको गरिमा र मर्यादा जोगाउन सबै सांसद जिम्मेवार बन्नुपर्ने उनको भनाइ छ ।