ट्रम्पद्वारा पाँच अफ्रिकी राष्ट्रपतिलाई निमन्त्रणा, व्यापार र सुरक्षा विषयमा छलफलको अपेक्षा

काठमाडौं । अमेरिकी राष्ट्रपति डोनाल्ड ट्रम्पले बुधबार ह्वाइट हाउसमा आयोजना हुने दिवाभोजमार्फत अफ्रिकाका पाँच राष्ट्रपतिलाई स्वागत गर्ने भएका छन् ।

एटलान्टिक तटवर्ती अफ्रिकी मुलुकहरू सेनेगल, लाइबेरिया, गिनी–बिसाउ, मौरिटानिया र ग्याबोनका राष्ट्रपतिहरू ट्रम्पको निमन्त्रणामा वाशिंगटन पुग्न लागेका हुन् ।

यस भेटमा व्यापार, लगानी र सुरक्षा लगायतका विषयमा छलफल हुने अपेक्षा गरिएको छ । यद्यपि, ह्वाइट हाउसले बैठकबारे विस्तृत विवरण भने सार्वजनिक गरेको छैन ।

ट्रम्प प्रशासनले हाल कर सुधार र व्यापार सम्झौतामा ध्यान दिइरहेको बेला यो भेट हुन लागेको हो । साथसाथै, महत्वपूर्ण खनिज आपूर्तिको स्थायित्वप्रति पनि अमेरिका चासो देखाइरहेको छ ।

भेटको सन्दर्भमा लाइबेरियाका राष्ट्रपति जोसेफ बोकाईका प्रेस सचिव कुला फोफानाले राष्ट्रले लगानी र साझेदारलाई प्राथमिकता दिने बताए । गाबोनी राष्ट्रपतिका प्रवक्ता थियोफेन बियोगेले बैठकले गाबोनको अर्थतन्त्र औद्योगीकरणमा टेवा पुग्ने अपेक्षा व्यक्त गरे ।

यो बैठक अमेरिकी वैदेशिक सहायता निकाय युएसएआईडीको औपचारिक बन्दको घोषणा भएको केही दिनमै हुन लागेको हो, जसले अमेरिकी अफ्रिका सम्बन्धको नयाँ दिशा संकेत गर्न सक्छ ।