तिब्बतबाट आएको बाढीको प्रभाव : शव जल्दाजल्दै त्रिशूलीमा बग्यो चिता

काठमाडौं । धादिङको बेनिघाट रोराङ गाउँपालिका–७, चरौंदी नजिकै त्रिशूली नदी किनारमा अन्त्येष्टि गरिँदै गरेको चिता बाढीले बगाएको छ । चीनको स्वशासित क्षेत्र तिब्बतबाट आएको बाढी भोटेकोसी हुँदै त्रिशूलीमा मिसिँदा त्रिशूली नदी किनारमा अन्त्येष्टि गरिँदै गरेको चिता बाढीले बगाएको हो ।

बेनिघाट रोराङ गाउँपालिकाका अध्यक्ष कृष्णबहादुर थपलिया ‘विवेक’ले आज मंगलबार बिहान साढे ९ बजेतिर त्रिशूली नदीमा अचानक बाढी बढेपछि जलिरहेको शवको अवशेषसहित चिता नै बगाएको बताए । 

आज बिहान ५ बजे निधन भएका एक आफन्तको शवलाई चरौंदीस्थित त्रिशूली किनारमा दाहसंस्कार गरिँदै गरेको बेला शवको अवशेषसहित चिता नै बगाएको उनले बताए । उनले भने, ‘शव त लगभग जलिसकेको अवस्था थियो, चिता भने अझै बाँकी थियो । त्यही बेलामा बाढी आएर बगायो । तर हामी सबै सुरक्षित छौँ ।’

उता, चीनबाट आएको बाढीको प्रभाव त्रिशूली नदी र बुढीगण्डकी दोभानसम्म देखिन सक्ने बाढी पूर्वानुमान महाशाखाले जनाएको छ । चीनबाट मंगलबार बिहान आएको भीषण बाढी भोटेकोसी नदीमा मिसिँदा नेपाली भूभागमा व्यापक क्षति पुगेको छ । डेढ दर्जन हराइरहेका छन् । 

बाढी पूर्वानुमान महाशाखाका अनुसार, नारायणी नदी जलाधारको त्रिशूली उपजलाधारअन्तर्गत भोटेकोसी नदीमा तिब्बत क्षेत्रबाट ठूलो बाढी प्रवेश गरेको महाशाखाले जनाएको छ । महाशाखाले भनेको छ, ‘यस विभागको भोटेकोसीस्थित रसुवा–स्याप्रुबेंसी जलमापन केन्द्रमा आज बिहान ३ः३० बजे बाढी पुगेको देखिन्छ ।’

महाशाखाका अनुसार उक्त बाढी बिहान ५ बजेतिर बेत्रावती आइपुगेको थियो । बेत्रावती केन्द्रमा बहाव करिब साढे २ मिटरसम्म बढेको र हाल केही घट्दो क्रममा रहेको महाशाखाले जनाएको छ । 

महाशाखाले त्रिशूली नदी किनार आसपासका स्थानीयलाई सतर्क रहन आग्रह गर्दै भनेको छ, ‘प्रारम्भिक रूपमा यस बाढीको प्रभाव त्रिशूली नदीको बुढीगण्डकी दोभान (बेनिघाट) आसपाससम्म पर्ने देखिएकोले आज दिउँसोसम्मै सतर्कता जरुरी देखिएको छ ।’