प्रचण्डको दाबी– ‘०८४ लाई क्रान्तिको एउटा नयाँ चरणको रुपमा अघि बढाउँछौँ’

काठमाडौं । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले आउँदो वर्ष ०८४ लाई नेपाली क्रान्तिको नयाँ चरणको रुपमा अघि बढाउने दाबी गरेका छन् ।

शनिबार पार्टी केन्द्रीय कार्यालय पेरिसडाँडामा आयोजित पर्सा–काठमाडौं सम्पर्क समन्वय समितिको कार्यक्रमलाई सम्बोधन गर्दै अध्यक्ष प्रचण्डले ०८४ बाट मुलुकलाई परिवर्तनको नयाँ दिशातर्फ डोहोर्याउने बताएका हुन् ।

उनले महिला, उत्पीडित, आदिवासी, जनजाति लगायत सबै वर्गको मुक्तिका लागि उठाइने क्रान्तिको झण्डा सफल बनाउन सबैलाई सक्रिय हुन आग्रह गरे । जनयुद्धको समयमा गीत, संगीत र नृत्यले जनमानसमा पुर्‍याएको प्रभाव उल्लेख गर्दै उनले भने, ‘भाषण, दर्शन र सिद्धान्तको व्याख्याभन्दा पनि गीत, संगीत र नृत्यहरुले जनयुद्धमा ठूलो भूमिका खेलेका थिए । आगामी निर्वाचनमा पनि यही माध्यम निर्णायक बन्नेछ ।’

अध्यक्ष प्रचण्डले पर्साबाट माओवादी केन्द्रको विजय यात्रा सुरु भएको दाबी गर्दै पार्टीलाई आगामी निर्वाचनमा जिताउने संकल्प व्यक्त गरे ।

‘आउँदै गरेको ०८४ लाई हामीले नेपाली क्रान्तिको नयाँ चरणमा प्रवेश गराउनेछौँ भन्ने दृढ विश्वास छ,’उनले भने, ‘मलाई विश्वास छ, तपाईंहरु सबै कमरेडले पनि आफ्नो भूमिका पूरा गर्नुहुनेछ ।’