काठमाडौं । थाइल्यान्डबाट भारत फर्किएका एक यात्रुको साथबाट १६ वटा जीवित सर्प बरामद भएको छ।
मुम्बई विमानस्थलमा भारतीय भन्सार अधिकारीहरूले ती सर्पसहित यात्रुलाई नियन्त्रणमा लिँदै तस्करी प्रयास विफल बनाएका हुन्।
यो घटना चालु महिनामै भएको तेस्रोपटकको वन्यजन्तु तस्करी प्रयास हो। पक्राउ परेका व्यक्तिबारे थप अनुसन्धान भइरहेको अधिकारीहरूले जनाएका छन्।
जफत गरिएका सर्पहरूमा गार्टर सर्प, राइनो र्याट सर्प, र केन्याली स्यान्ड बोआजस्ता प्रजातिहरू छन्, जुन प्रायः विषरहित मानिन्छन्। यस्ता जीवजन्तुहरू प्रायः गैर कानुनी रूपमा व्यापार गर्ने उद्देश्यले तस्करी गरिने गरिएको पाइन्छ।
वन्यजन्तु व्यापार निगरानी संस्था ‘ट्राफिक’ ले यस घटनालाई ‘गम्भीर चिन्ताको विषय’ भन्दै पछिल्ला साढे तीन वर्षमा मात्र थाइल्यान्ड–भारत हवाई मार्ग हुँदै ७,००० भन्दा बढी जीवजन्तु जफत भइसकेको तथ्यांक सार्वजनिक गरेको छ।
यसरी दोहोरिँदो तस्करीको प्रयासले भारत र छिमेकी देशहरूमा वन्यजन्तु संरक्षण र जैविक विविधतामाथि गम्भीर चुनौती खडा भएको ट्राफिकको भनाइ छ।
यो खबर पढेर तपाईलाई कस्तो महसुस भयो ?
प्रतिक्रिया