चौलानी नदीमा हाम फालेका युवक बेपत्ता

बैतडी । बैतडीको डिलासैनी गाउँपालिका–३ सिमारका एक युवक चौलानी नदीमा हाम फालेर बेपत्ता भएका छन् ।

बेपत्ता हुनेमा २६ वर्षीय महेश राना रहेको जिल्ला प्रहरी कार्यालय बैतडीका प्रवक्ता प्रहरी निरीक्षक बलराम पाण्डेयले जानकारी दिए । उनका अनुसार राना आज बिहान ६ बजेतिर घरनजिकै रहेको चौलानी नदीमा हाम फालेका हुन् भन्ने जानकारी पारिवारिक स्रोतले दिएको छ ।

हाल बेपत्ता रानाको खोजी कार्य जारी रहेको र घटनास्थलमा प्रहरी टोली खटिएको पाण्डेयले बताए । राना किन नदीमा हाम फाले भन्नेबारेमा यकिन कारण खुलेको छैन । घटनाबारे थप अनुसन्धान भइरहेको प्रहरीले जनाएको छ ।