रवि लामिछानेको बचाउमा हस्ताक्षर संकलन गर्दै मनायो रास्वपाले स्थापना दिवस

काठमाडौं । राष्ट्रिय स्वतन्त्र पार्टी (रास्वपा)ले पार्टी सभापति रवि लामिछानेको बचाउ र भ्रष्टाचारविरुद्ध खबरदारी गरेर स्थापना दिवस मनाएको छ ।

पार्टी स्थापना भएको तीन वर्ष पुगेको अवसरमा रास्वपाले माइतीघरमा सभापतिलाई प्रतिसोध राखेर कानुनी झमेलामा फसाएको भन्दै हस्ताक्षर संकलन गरेको छ ।

रास्वपाका सांसदहरू माइतीघरबाट हिँडेर संसद् भवनतिर लागेका छन्। माइतीघरमा तेस्रो स्थापना दिवसको अवसरमा पार्टीले आयोजना गरेको बृहत् भेलामा सहभागी भएर सांसदहरू सदनतिर लागेका हुन्।

‘लुटतन्त्रको खारेजी र सुसंस्कृत राजनीतिको संवर्द्धन’ का लागि सडक र सदनमा सँगै उत्रिएको प्रवक्ता मनिष झाले जानकारी दिए।

रास्वपाले भिजिट भिसा प्रकरणमा गृहमन्त्रीको राजीनामा र छानबिन समितिको माग गर्दै संसद् अवरोध गरिरहँदा, सभापति रवि लामिछानेविरुद्धको मुद्दालाई ‘राजनीतिक प्रतिशोध’ भन्दै समर्थन जुटाउन हस्ताक्षर अभियान पनि सुरु गरेको छ। हाल लामिछाने भैरहवा कारागारमा छन्।