प्रतिपक्षीहरूलाई जिम्मेवार बन्न एमाले प्रमुख सचेतक बर्तौलाको आग्रह 

काठमाडौं । नेकपा (एमाले)का प्रमुख सचेतक महेश बर्तौलाले संसद्को गतिरोध अन्त्य गर्नका लागि प्रतिपक्षी दलहरूलाई जिम्मेवार बन्न आग्रह गरेका छन् । 

बिहीबार संसद् भवन परिसरमा सञ्चारकर्मीहरूसँग कुराकानी गर्दै उनले यस्तो आग्रह गरेका हुन् ।उनले प्रतिपक्षीको निरन्तरको अवरोधका कारण बजेटमाथिको बहस प्रभावित हुनुको साथै महत्त्वपूर्ण विधेयकहरू अघि बढाउन नसकिएको बताए । संघीयता कार्यान्वयनका लागि महत्त्वपूर्ण मानिएको निजामती विधेयक पास गर्ने विषय पनि प्रतिपक्षीको अवरोधका कारण रोकिएको उनको भनाइ छ । 

उनले भने, ‘प्रतिपक्षी दलहरूले निरन्तर संसद्मा अवरोध सिर्जना गर्दा बजेटजस्तो महत्त्वपूर्ण विषयमा छलफल गर्ने कुरा प्रभावित भयो । अहिले हामी संघीय निजामती सेवा विधेयक पनि पास गर्ने तयारी पुगिसक्थ्यौँ । संघीयता कार्यान्वयनको लागि यो महत्त्वपूर्ण विधेयक हो । यो कुरामा प्रमुख प्रतिपक्षीसहितका विपक्षी पार्टीहरू जिम्मेवार बनुन् भन्ने फेरि पनि हाम्रो आग्रह छ । भोलि १ बजेसम्म उहाँहरूले आफूलाई रिभ्यू गर्नुहुनेछ । भोलिदेखि हाउसलाई अगाडि बढाउन सहयोगी भूमिका खेल्नुहुनेछ भन्ने हाम्रो विश्वास र अपेक्षा छ ।’

भिजिट भिसाको आवरणमा गृहमन्त्रीले राजीनामा दिनुपर्ने, उच्चस्तरीय छानबिन आयोग गठन गर्नुपर्ने माग राख्दै प्रतिपक्षी दलहरूले निरन्तर संसद् अवरोध गर्दै आएका छन् । निरन्तरको संसद् अवरोधका कारण अगामी आर्थिक वर्षको आय र व्ययको अनुमानमाथिको छलफल प्रभावित भएको छ ।