काठमाडौं । सशस्त्र प्रहरी महानिरीक्षक राजु अर्यालले विपद् स्वयंसेवक तथा विपद् सूचकहरूको सञ्जाल मार्फत विपद्को पूर्वजानकारी, परिचालन, उद्धार एवं राहत कार्य प्रभावकारी हुने बताएका छन् ।
स्विट्जरल्याण्डको जेनेभामा सञ्चालन भइरहेको विपद् जोखिम न्यूनीकरणको लागि विश्वव्यापी प्लेटफमको आठौँ सत्रलाई सम्बोधन गर्दै महानिरीक्षक अर्यालले सशस्त्र प्रहरी बल नेपालको विपद् व्यवस्थापन तालिम शिक्षालय र पर्वतीय उद्धार तालिम शिक्षालय स्थापना भई विपद् व्यवस्थापनसँग सम्बन्धित उच्चस्तरीय तालिम सञ्चालन गरी दक्ष जनशक्ति उत्पादन गरिरहेको बताए । उनले समुदाय विपद् स्वयंसेवक तथा विपद् सूचक मार्फत भौगोलिक तथा विपद्जन्य अवस्थामा छिटो सूचना प्राप्त हुने र यसले विपद् व्यवस्थापनमा सहकार्य तथा सहजता आउने भएकाले सशस्त्र प्रहरी बल नेपालले यस कार्यलाई उच्च प्राथमिकतामा राखेको उल्लेख गरे ।
यस प्रकारको सञ्जाल र सामुदायिक साझेदारीले विपद्को पूर्वतयारी, व्यवस्थापन, उद्धार र राहतमा समेत स्थानीय समुदाय र सुरक्षाकर्मीबिच समन्वय हुने भएकोले यो कार्य विपद्सँग जुध्नका लागि उपयोगी र प्रभावकारी हुनेमा जोड दिए ।
महानिरीक्षक अर्यालले अन्तरनिकाय समन्वय र यससँग सम्बन्धित डाटाको आदान–प्रदान, युवा तथा समुदायलाई अग्रपंक्तिमा राखेर विपद्को सामना गर्न सकिने भएकाले जलवायु परिवर्तनको संवेदनशीलतालाई दृष्टिगत गरेर नेपालले हालै सगरमाथा संवाद मार्फत विश्व संवादको थालनी गरेको बताए ।
सम्बोधनको क्रममा उनले नेपाल प्राकृतिक विपद्हरूको अग्रपंक्तिमा रहेकोले यस्ता प्रकारका चुनौती सामना गर्न र विपद् जोखिम न्यूनीकरण गर्न दृढ प्रतिबद्ध रहेको बताए ।
विश्वभरिका विपद्सँग सम्बन्धित देशहरूको सहभागिता रहेको कार्यक्रममा महानिरीक्षक अर्यालले विपद्को सामना गर्न एक्लो प्रयासले मात्र सम्भव नहुने भएकोले यसमा विश्व समुदायको सामूहिक प्रयास र अन्तरनिकाय समन्वय हुनुपर्नेमा जोड दिए ।
विपद् व्यवस्थापनलाई अझै प्रभावकारी बनाउन डिजास्टर गभरमेन्ट्स राम्रो हुनुपर्ने र सेन्दाई फ्रेमवर्क, पेरिस सम्झौता र दिगो विकास लक्ष्यहरूको प्रतिज्ञा पूरा गर्न एकैसाथ क्रियाशील हुनुपर्ने र त्यसलाई पूरा गर्नका लागि नेपाल सरकार र सशस्त्र प्रहरी बल नेपाल अग्रसर र प्रतिबद्ध रहेको समेत उनले बताएको सशस्त्र प्रहरी बलका सह प्रवक्ता डिएसपी शैलेन्द्र थापाले जानकारी गराए ।
नेपाली भूगोल समुन्द्री सतहबाट ५९ मिटरदेखि ८ हजार ८ सय ४८ मिटर अग्लो विश्वको सर्वोच्च शिखर सगरमाथासम्म रहेकोले भूकम्प, बाढी, पहिरो, चट्याङ जस्ता प्रकोपहरूको सामना गरिरहेको तथा स्थानीय रूपमा गरिएको कार्य तथा विश्वव्यापी रणनीतिहरूमा एकसाथ अघि बढ्न सकिने उनको भनाइ थियो । होचो भू–भागदेखि अग्लो भू–भागसम्म हाम्रा सुरक्षाकर्मीले विपदमा गरेको अनुभव र कार्यकुशलता विश्वको जुनसुकै राष्ट्रमा पनि उपयोग हुने समेत महानिरीक्षक अर्यालले बताए ।
विपदमा अन्तर्राष्ट्रिय सहकार्यको लागि आह्वान गर्दै महानिरीक्षक अर्यालले दिगो विकास लक्ष्यहरूको प्रतिज्ञा पुरा गर्न एकैसाथ क्रियाशील हुनुपर्नेमा जोड दिए । सो कार्यक्रममा गृहसचिव गोकर्णमणि दुवाडीसमेत सहभागी भएको डिएसपी थापाले जनाए ।
यो खबर पढेर तपाईलाई कस्तो महसुस भयो ?
प्रतिक्रिया