माओवादीले भन्यो– ‘गृहमन्त्रीलाई हामीले दोषी देखाएका छैनौँ’

काठमाडौं । विपक्षी दल माओवादी केन्द्रका उपमहासचिव वर्षमान पुनले भिजिट भिसा प्रकरणमा गृहमन्त्री रमेश लेखकलाई आफूहरुले दोषी करार नगरेको बताएका छन् ।

सोमबार सिंहदरबारमा माओवादीको संसदीय दलको बैठकपछि बाहिरिने क्रममा सञ्चारकर्मीहरुसँग कुरा गर्दै पूर्वमन्त्री समेत रहेका पुनले सो कुरा बताएका हुन् ।

उनले गृहमन्त्रीलाई अहिले नै दोषी करार नगरेको र पहिलेको तथ्य ल्याएर अहिले गृहमन्त्रीलाई बचाउन नहुने समेत तर्क गरे ।

‘भोली हामी पुनः एकपटक बस्छौँ । अन्य विपक्षी दलहरुको पनि कुरा सुन्छौँ, गृहमन्त्री को तानिन्छ ? गृहसचिव या डिजीहरु या कार्यालय प्रमुख को तानिन्छ ? अनुसन्धानपछि तानिन्छ, जो तोनिए पनि तानिन्छ नि ! तर फेरि हिजो को थियो ? अस्ति को थियो ? भन्दै त्यस्ता विषयलाई विषयान्तर गर्न मिल्दैन । यो त आजको विषय हो नि त ! आजको तथ्य के स्थापित छ भने त्रिभुवन अन्तर्राष्ट्रिय विमानस्थलको अध्यागमनमा अनियमितता भएको छ,’ उनले भने ।
त्यस्तै त्रिभुवन अन्तर्राष्ट्रिय विमानस्थलमा भिजिट भिसा प्रकरणमा सेटिङ भएर सर्वसाधारण ठगिएको दाबी गरे । साथै पहिलेको तथ्यलाई ल्याएर अहिले गृहमन्त्रीलाई उन्मुक्ति दिन नमिल्ने समेत उनले बताए । अहिले गृहमन्त्रीमाथि प्रश्न उठेकाले राजीनामा दिएर मार्गप्रशस्त गरी अनुसन्धानमा सघाउन समेत आग्रह गरे ।

‘त्यहाँ सेटिङमा काम भएको छ । भिजिट भिसा प्रकरणमा हजारौँ मान्छे सेटिङमा पुर्याइएको छ, जो सेटिङमा पर्दैन त्यसलाई चाँही फिर्ता गरिएको छ दुख दिइएको छ भन्ने तथ्य आम रुपमा स्थापित भएको छ,’ उनले भने, ‘यो कुराको छानबिन हुनुपर्दछ । छानबिन हुनुपर्छ भन्नुको मतलब गृहमन्त्री दोषी कसैले भनेको छैन, तर छानबिन अगाडी उहाँले राजीनामा दिएर मार्गप्रशस्त गर्नुपर्छ भन्ने माग हाम्रो दलको हो, प्रतिपक्षको हो ।’