नवलपरासीमा एम्बुलेन्स र स्कुल भ्यान ठोक्किँदा एकको मृत्यु, पाँच घाइते

काठमाडौं । नवलपरासी (बर्दघाट–सुस्तापूर्व)को देवचुलीमा सोमबार बिहान एम्बुलेन्स र स्कुल भ्यान ठोक्किँदा एक जनाको मृत्यु भएको छ भने पाँच जना घाइते भएका छन् । 

नारायणगढतर्फ बिरामी बोकेर जाँदै गरेको ना४च ४६१६ नम्बरको एम्बुलेन्स र विपरीत दिशामा जाँदै गरेको बा२०च ७२ नम्बरको स्कुल भ्यान एक आपसमा ठोक्किँदा दुर्घटना भएको हो । 

 दुर्घटनामा दिव्य एकेडेमी बोर्डिङ स्कुल, केउरेनीका भ्यान चालक ५२ वर्षीय कुलप्रसाद सुवेदी गम्भीर घाइते भएका थिए। टाउको र खुट्टामा गम्भीर चोट लागेका सुवेदीको भरतपुरस्थित चितवन मेडिकल कलेजमा उपचारका क्रममा बिहान मृत्यु भएको प्रहरीले जनाएको छ।

 अन्य घाइतेहरूको भरतपुरको मनकामना अस्पतालमा उपचार भइरहेको प्रहरीले जानकारी दिएको छ।