काठमाडौं । मिर्गौला प्रत्यारोपण पश्चात् सगरमाथाको सफल आरोहण गरेका आरोही पेम्बा शेर्पालाई स्वास्थ्य तथा जनसंख्या मन्त्रालयले प्रत्यारोपणको एम्बास्डर बनाउने भएको छ ।
शुक्रबार स्वास्थ्य तथा जनसंख्या मन्त्रालयमा आरोही शेर्पाको सम्मानको लागि आयोजित समारोहलाई सम्बोधन गर्ने क्रममा स्वास्थ्य मन्त्री प्रदीप पौडेलले प्रत्यारोपणको एम्बास्डर बनिदिन आग्रह गरेका हुन् ।
उनले प्रत्यारोपण क्षेत्रमा स्वास्थ्य मन्त्रालयले एम्बास्डर बनाउने घोषणा गरे । शेर्पाले मिर्गौला प्रत्यारोपण गरिसकेपछि पनि सगरमाथाको सफल आरोहण गरेर ठुलो उदाहरण पेस गरेको उल्लेख गर्दै सफल र उदाहरणीय इतिहास समाजलाई बताउन जरुरी रहेको बताए ।
स्वास्थ्य मन्त्री पौडेलले पर्यटन मन्त्रालयलाई रोयल्टीमा भरियाहरूको बीमा शुल्क समेत जोड्न लगाइ हरेकलाई बीमामा आबद्ध गर्न आग्रह गर्ने बताए ।
त्यसो गर्न सम्भव नभए स्वास्थ्य मन्त्रालयले आधा, पर्यटन मन्त्रालयले आधा व्यहोरेर सबै पोर्टरहरुलाई निःशुल्क स्वास्थ्य बीमा गर्ने प्रबन्ध गर्ने प्रतिबद्धता जनाए । सगरमाथा क्षेत्रमा धेरै फोहोर बढेको भन्दै प्रकृतिको अमूल्य उपहार दूषित हुन दिनु नहुने उनको भनाइ छ ।
मन्त्री पौडेलले भने, ‘तपाईँले यस क्षेत्रमा एउटा ठुलो उदाहरण पेस गर्नुभएको छ । अब यो कुरा तपाईँले तपाईँसँग मात्र राखेर अर्थ छैन । तपाईँको सफल र उदाहरणीय इतिहास समाजलाई बताउनुपर्छ । तपाईँ खास प्रत्यारोपणको एम्बास्डर हुनुपर्छ । यो प्रत्यारोपण क्षेत्रमा स्वास्थ्य मन्त्रालयले एम्बास्डर बनाउनेछ । अब भरियाहरूको स्वास्थ्य बीमा हुने व्यवस्था गर्नुपर्छ । त्यसमा पर्यटन मन्त्रालयलाई रोयल्टीमा भरियाहरूको बीमा शुल्क समेत जोडिदिनुस् । हरेकलाई बीमामा आबद्ध गरिदिनुस् । त्यसो गर्न सम्भव छैन भने स्वास्थ्य मन्त्रालयले आधा, पर्यटन मन्त्रालयले आधा व्यहोरेर सबै पोर्टरहरुलाई निःशुल्क स्वास्थ्य बीमा गर्ने प्रबन्ध गरिनुपर्छ । सगरमाथा क्षेत्रमा असाध्यै फोहोर बढेको स्थिति रहेछ । प्रकृतिको अमूल्य उपहार दूषित हुनु हुँदैन, त्यसलाई जोगाउन हामी प्रयत्न गर्नेछौँ ।’
कार्यक्रममा आरोही शेर्पाले रोगबारे थाहा नपाइकनै अन्तिम स्टेजमा पुगेपछि थाहा पाएको बताए । उनले जापानबाट नेपाल आइसकेपछि मात्रै आफू बचेको जिकिर गरे । उनले नेपालमा आएर उपचार गर्दा धेरै नै खर्च भएको बताए । तीन महिनाभित्र शहीद धर्मभक्त प्रत्यारोपण केन्द्रबाट मिर्गौला प्रत्यारोपण गरी अहिले स्वस्थ रहेको उनको भनाइ छ ।
जलवायु परिवर्तनको असर सगरमाथामा विकराल रहेको भन्दै उनले हिमालका हिउँ पग्लिएर कालो पत्थरमा रूपान्तरण भएको बताए ।
यो खबर पढेर तपाईलाई कस्तो महसुस भयो ?
प्रतिक्रिया