भिजिट भिसा प्रकरणमा गृहले भन्यो- ‘अख्तियारबाट हुने छानबिनमा पूर्ण सहयोग रहन्छ’

काठमाडौं । गृह मन्त्रालयले कुनै पनि गैरकानुनी वा भ्रष्टाचारजन्य कार्यमा मन्त्रालय र नेतृत्वको कुनै प्रकारको संलग्नता नरहेको दाबी गरेको छ ।

भिजिट भिसामा युवाहरूलाई विदेश पठाएर मोटो रकम असुलेको र त्यसमा गृहमन्त्रीकै संलग्नता भएको समाचारहरू सार्वजनिक भएपछि शनिबार मन्त्रालयले विज्ञप्ती जारी गरी त्यसको छानबिन अख्तियारले गरिरहेको र त्यसमा पूर्ण सहयोग हुने बताएको हो।

‘विगत केही दिनयता त्रिभुवन अन्तर्राष्ट्रिय विमानस्थल अध्यागमन कार्यालयको घटनासँग मन्त्रालयको नेतृत्वलाई जोडेर विभिन्न पत्रपत्रिका तथा सामाजिक सञ्जालमा आएका समाचार एवम् क्रियाप्रतिक्रिया प्रति मन्त्रालयको गम्भीर ध्यानाकर्षण भएको छ । यस प्रकारका कपोलकल्पित, भ्रामक र आधारहीन समाचार प्रकाशित र प्रसारित भएको प्रति मन्त्रालय दुःख व्यक्त गर्दछ । यस्ता कुनै पनि गैरकानूनी वा भ्रष्टाचारजन्य कार्यमा मन्त्रालयको नेतृत्वको कुनै प्रकारको संलग्नता नरहेको र नरहने विषय स्पष्ट गर्दछौँ ।, ’ विज्ञप्तिमा भनिएको छ ।