आर्थिक क्षेत्रमा राष्ट्र बैंकको भूमिका महत्त्वपूर्ण छ, त्यसैअनुसार काम गर्छु : नवनियुक्त गभर्नर पौडेल

काठमाडौं । नेपाल राष्ट्र बैंकका नवनियुक्त गभर्नर डा. विश्वनाथ पौडेलले पदभार ग्रहण गरेका छन् । पदभार ग्रहणपछि नवनियुक्त गभर्नर पौडेलले पाँच सय र एक हजारका नयाँ नोट छपाई गर्ने निर्णयमा हस्ताक्षर गरेका हुन् । 

पदभार ग्रहणपछि प्रतिक्रिया दिँदै उनले मौद्रिक नीति र वित्त नीति अलग विषय रहेको बताउँदै मौद्रिक नीतिले सरकारको वित्त नीति कार्यान्वयनमा केही अवरोध गरेको भए परिमार्जन गर्दै जाने बताए । उनले पहिलो काम मौद्रिक नीतिले तय गरेका विषयहरूलाई सफल बनाउनेतर्फ र अर्को काम सुपरिवेक्षण बढाउने भएको स्पष्ट पारे । नेपालका विभिन्न बैंकहरुमा सर्वसाधारणका धेरै पैसा बसेका र तिनीहरूको सुरक्षाका लागि सुपरिवेक्षण प्राथमिकतामा पर्ने उनको भनाइ थियो । 

उनले भने, ‘राष्ट्र बैंकको भूमिका महत्त्वपूर्ण छ सबैलाई थाहा नै छ । हामी दुईटा कुरालाई फोकस गर्छौँ । एउटा मौद्रिक नीतिले तय गर्छ यसलाई सफल बनाउनका लागि र अर्को सुपरिवेक्षण नै हो । धेरै नियम बनाएर काम देखिँदैन त्यसैले सुपरिवेक्षणलाई बढाउ भन्ने छ । बैंकको क्षमता बढाउने हो त्यसमाथि बैंकको मेजर काम सबैलाई थाहै छ । विभिन्न बैंकमा सर्वसाधारणका पैसा बसेका छन्, तिनीहरूको सुरक्षा गर्ने । ल्याण्डिङ पोलिसि राम्रो ल्याउने हो । ल्याण्डिङ पोलिसिहरु पोलिसीहरुको प्रयोग राम्रोसँग भएको छ छैन भनेर अनुगमन गर्ने । निरन्तर मूल्यांकन गर्नेलगायतका कार्यहरू प्राथमिकतामा छन् । त्यसै गरी मौद्रिक नीतिले तय गरेका कामहरू सम्पन्न गर्नु नै मुख्य उद्देश्य हुन्छ । अर्को चाहिँ भनेको सुपरिवेक्षणमा नै फोकस हुन्छ । मैले पोलिसी मेकिङ सधैँ सम्भावनारहित हुनुपर्छ भनेको छु । हाम्रो देशमा धेरै स्टेक होल्डरहरु छन् । सुरुमा म आफैँ सोलुशन ल्याएर यसैलाई गरौँ भन्ने पक्षमा पनि छैन । सबैलाई मैले के भनेको छु भने एक दिन अगाडि मौद्रिक नीति ल्याएर यसैमा सबैलाई जबरजस्ती गराउने हैन । नीतिका विषयमा सम्बन्धित पक्षहरूसँग छलफल नै गर्छु पहिला । त्यसको आधारमा मौद्रिक नीति तय हुन्छ । त्यसैले सबैले राम्रो सोच्नुपर्ने हुन्छ । हामीले अहिले दिएका अधिकारहरू प्रयोग गर्ने हो र ऐनअनुसार काम गर्ने हो । दिएका अधिकारहरू प्रयोग गरेरै काम गर्ने हो त्यसका लागि नेपाल राष्ट्र बैंकका सम्पूर्ण कर्मचारीको एकमत रहन्छ ।’

उनले गभर्नरका अर्का आकांक्षी राष्ट्र बैंकका कार्यकारी निर्देशक गुणाकर भट्टको राजीनामा अस्वीकृत हुनु आन्तरिक कुरा भएको बताए ।