हरि ढकालको आरोप– ‘राजनीतिक दलहरूले राज्य संयन्त्रलाई दलीय चक्रव्यूहमा फसाए’

लोकपथ

२०८२,जेष्ठ,१,बिहीवार १३:४६

काठमाडौं । राष्ट्रिय स्वतन्त्र पार्टीका सांसद सांसद हरि ढकालले राज्य संयन्त्रहरू दलीय चक्रव्यूहमा फसाएर राजनीतिक दलहरूले आफ्नो स्वार्थअनुकुल प्रयोग गरेको आरोप लगाएका छन् ।

बिहीबार प्रतिनिधि सभा बैठकको विशेष समयमा बोल्दै उनले राज्य संरचनाहरू चक्रव्यूहमा फसाएर निहित स्वार्थका लागि प्रयोग भइरहँदा तत्काल फाइदा भए पनि आम नागरिक र विश्व जगत चकित भइरहेको बताए ।

उनले राष्ट्र बैंकजस्तो गरिमामय संस्थाको प्रमुख नियुक्तिका विषयमा लज्जास्पद र ऐतिहासिक भुल भइरहेको भन्दै आगामी दिनमा यसले राष्ट्र बैंकको गरिमा क्षयीकरण हुने बताए ।

विगतमा पनि दलीय करणको बाछिटा राष्ट्र बैंकमा परिसकेको बताउँदै सांसद ढकालले राजनीतिक बाछिटाबाट उत्पन्न परिस्थिति सबैले देखेको स्मरण गराए । उनले दलहरूले राष्ट्र बैंकको गभर्नर नियुक्तिमा दलहरूले गरिरहेको अभ्यास निन्दनीय भएको बताए ।

उनले भने, ‘दलीय करणको चक्रव्यूहमा हाम्रा राज्यसंयन्त्रहरु कसरी फसेका छन् हामी सबै जानकार छौँ । यो चक्रव्यूहमा संरचनाहरू फसाएर राजनीतिक दलले आफ्नो स्वार्थका लागि प्रयोग गर्दा र आफ्ना र आफन्तीका लागि प्रयोग गरिँदा त फाइदै भएको होला तर आम नागरिक, विश्व जगत र सबै चकित हुनेगरि हाम्रो राज्यका संरचनाहरु दलीय चक्रव्यूहमा फसेका छन् । यसै सन्दर्भमा राष्ट्र बैंकजस्तो संस्थामा गभर्नर नियुक्तिका विषयमा जुन किसिमको लज्जास्पद अभ्यास र ऐतिहासिक भुल गरिँदै छ यसले भोलिका दिनमा अलिकति बचेको राष्ट्र बैंकको गरिमा पनि क्षयीकरण हुने निश्चित छ र क्षयीकरण पक्का हुन्छ । विगतमा दलीय करणको बाछिटा राष्ट्र बैंकमा परेको थियो । त्यो राजनीतिक बाछिटाले विगतमा अर्थ मन्त्रालयसँग राष्ट्र बैंकको द्वन्द्व सतहमै आएको थियो । बजेट नीति र मौद्रिक नीति कार्यान्वयनमा दलीय बाछिटाले कस्तो असर पार्‍यो सबै जानकार छौँ । यसले समग्र अर्थतन्त्रमा कस्तो असर पार्‍यो, निजी क्षेत्रलाई कसरी हतोत्साहित गर्‍यो ? यी चिज जान्दा जान्दै फेरि दलीय करणको अभ्यासमा दलबाट नै खुलम खुला रूपमा हाम्रा दलका तर्फबाट भनेर जुन किसिमको अभ्यास गरिँदै छ, त्यो निन्दनीय छ । यस प्रकारका दलीय करणका शैलीले संरचनामा भएका कब्जाका कारणले गर्दा विगतमा धितोपत्र बोर्डमा १० महिना सिइओ नियुक्त नहुँदा कस्तो प्रभाव रह्या सिंगो सदनले बहस गर्नुपर्ने होइन ?’