काठमाडौं । एकता, उत्साह र खेल प्रतिभाको अद्भुत प्रदर्शनका साथ डीएभी टोस्टमास्टर्स क्लब र टोखा टोस्टमास्टर्स क्लबले संयुक्त रूपमा २७ वैशाखमा डीएभी कलेज फुटसल ग्राउन्डमा अत्यन्त सफल टोस्टमास्टर्स फुटसल प्रतियोगिता २०२५ आयोजना गरे ।
लुगाज क्लोथिङ, स्किल स्क्वायर, ट्रिप हिमालयन टूर्स एन्ड ट्राभल्स, लहाना लन्चबक्स, र श्री तारा फुड्सको सहकार्यमा, साथै डीएभी स्पोट्र्स एन्ड इभेन्ट क्लब र डीएभी मिडिया एन्ड प्रमोशन क्लबको समर्थनमा सम्पन्न यस प्रतियोगितामा नेपालभरिका विभिन्न टोस्टमास्टर्स क्लबहरूबाट आठ उत्साही टिमहरूको सहभागिता रहेको थियो ।
दिनभर चलेको प्रतिस्पर्धी खेलहरूले उत्कृष्ट फुटबल कौशल देखाए सँगै टोस्टमास्टर्स समुदायको आत्मीयता, नेतृत्व मूल्य र सहकार्यको भावना झल्काएको जनाइएको छ ।
मैदानमा उत्साहपूर्ण वातावरण थियो जहाँ सदस्यहरू र समर्थकहरूले रोमाञ्चक खेलहरू अवलोकन गरे ।
जवालाखेल ओरेटर्स टोस्टमास्टर्स क्लबको टिम रुस्लानले अन्तिम खेलमा उत्कृष्ट प्रदर्शन गर्दै प्रतियोगिताको उपाधि जित्न सफल भएको थियो । अग्नि टोस्टमास्टर्स क्लबको टिम अग्नि स्कर्पियनले सराहनीय प्रदर्शन गर्दै उपविजेता बन्न सफल भएको हो ।
समापन समारोह एक रंगीन र हर्षोल्लासपूर्ण क्षण रह्यो, जहाँ खेलाडीहरूको समर्पण र आत्मालाई सम्मान गरिएको थियो । दुवै फाइनलिष्ट टिमलाई ट्रफी, मेडल र प्रमाणपत्र प्रदान गरियो भने उत्कृष्ट व्यक्तिगत प्रदर्शनकर्ताहरूलाई लुगाज क्लोथिङ र ट्रिप हिमालयन टूर्स एन्ड ट्राभल्सद्वारा विशेष ट्रफी तथा उपहारसहित सम्मानित गरिएको थियो ।
टिम रुस्लानका पृथम श्रेष्ठ ‘मोस्ट भ्यालुएबल पुरुष प्लेयर’ घोषित भए भने, उनकी टिममेट ओजश्वी तिमिल्सिना ‘मोस्ट भ्यालुएबल महिला प्लेयर’ बन्न सफल भइन् ।
त्यस्तै, दत्ता पनेरुलाई उत्कृष्ट गोलकिपिङ्ग प्रदर्शनका लागि ‘बेस्ट गोलकिपर’ को उपाधि दिइएको हो ।
टिम काठमाडौं नाइट्सका नवदिप खत्रीले उत्कृष्ट आक्रामक प्रदर्शन गर्दै ‘सर्वाधिक गोलकर्ता’ को उपाधि जिते ।
पुरस्कार वितरण समारोहमा डीएभी कलेजका समन्वयक माधव अधिकारी, डिभिजन बी डाइरेक्टर निराजन श्रेष्ठ तथा स्किल स्क्वायरका प्रबन्ध निर्देशक निराज प्रधानको विशिष्ट उपस्थिति रहेको थियो ।
उनीहरूले उत्कृष्ट खेलाडीहरूलाई ट्रफी, प्रमाणपत्र, र उपहार प्रदान गर्दै उनीहरूको मेहनत र प्रतिभालाई सम्मानित गरे ।
यो प्रतियोगिता केवल प्रतिस्पर्धात्मक कार्यक्रम मात्र नभएर मित्रता, टिमवर्क र नेपालमा बिस्तारै फस्टाइरहेको टोस्टमास्टर्स अभियानको उत्सव पनि बन्यो । सहभागी र दर्शकहरूको अत्यन्त सकारात्मक प्रतिक्रिया सहित, टोस्टमास्टर्स फुटसल प्रतियोगिता २०२५ ले नयाँ मापदण्ड स्थापना गरेको छ र आगामी वर्षहरूमा पनि बहुप्रतीक्षित वार्षिक परम्पराको रूपमा स्थापित हुने अपेक्षा गरिएको छ ।
यो खबर पढेर तपाईलाई कस्तो महसुस भयो ?
प्रतिक्रिया