काठमाडौं । नेपाल समाजवादी पार्टी (नयाँ शक्ति) का अध्यक्ष एवं पूर्व प्रधानमन्त्री डा. बाबुराम भट्टराईले नेपालका राजनीतिक दलहरू राज्य दोहनका साधन बनेको बताएका छन् । शनिबार काठमाडौंमा गैर आवासीय नेपाली संघ (एनआरएनए) को एकता महाधिवेशनलाई सम्बोधन गर्दै उनले यस्तो बताएका हुन् ।
उनले लोकतन्त्रमा दलहरू चाहिने तर राजनीतिक दलहरू स्वार्थ समूह बनिरहेको भन्दै लोकतन्त्रमा राजनीतिक दलहरू नै विचारका वाहक हुने बताए ।
उनले राजनीतिक दलहरूको प्रतिस्पर्धाबाट नै लोकतान्त्रिक वातावरण बन्ने जिकिर गरे । अध्यक्ष भट्टराईले नेपालका राजनीतिक दलहरू नयाँ रहेको र दलहरू विचार, राजनीति, सिद्धान्त, आदर्शमा भन्दा पनि एउटा स्वार्थ समूह जस्तो भएर जसरी पनि निर्वाचन जितेर सत्तामा पुग्ने खेलमा सीमित रहेको बताए ।
उनले राजनीतिक दलहरूले सरकारलाई बिना लगानी सम्पत्ति आर्जन गर्ने माध्यम बनाएको आरोप लगाए। राजनीतिक दलहरू विचार, सिद्धान्त, आदर्श, नैतिकताका वाहक हुन नसकेको उनको भनाइ छ । दलीय आबद्धता अब नेपालका निम्ति ठुलो बाधक बनिरहेको जिकिर गरे ।
अध्यक्ष भट्टराईले भने, ‘हाम्रा दलहरू चाहिन्छ । लोकतन्त्रमा दलहरू नै विचारका वाहक हुन्छन् । तिनको प्रतिस्पर्धाले नै लोकतान्त्रिक वातावरण बनाउँछ । लोकतान्त्रिक जगमा नै विकास हुन्छ भन्ने सामान्य विकासको नियम पनि हो । तर हाम्रा दलहरू भर्खर भर्खर बनेको हुनाले ती दलहरू विचार, राजनीति, सिद्धान्त, आदर्शमा भन्दा पनि एउटा स्वार्थ समूह जस्ता बनेका छन् । जसरी हुन्छ, चुनाव जित्ने, सत्तामा जाने, त्यसको दोहन गर्ने, छिटो सम्पत्ति आर्जन गर्ने । बिना लगानी सम्पत्ति आर्जन गर्ने, एउटा थलो जस्तो हाम्रो राजनीतिक दलहरू बनेका छन् । त्यसो भएको हुनाले राजनीतिक दलहरू भनेको विचार, सिद्धान्त, आदर्श, नैतिकताका वाहक हुनुपर्छ । तर राज्य दोहनका साधन बनेका छन् । त्यसैले दलीय आबद्धता अब हाम्रो निम्ति असाध्यै ठुलो बाधक बनिरहेको छ ।’
अध्यक्ष भट्टराईले नेपाली अर्थतन्त्रले साँच्चै नै गुणात्मक फड्को मार्ने हो भने गैर आवासीय नेपालीहरूको भूमिका अहं हुने बताए ।
यो खबर पढेर तपाईलाई कस्तो महसुस भयो ?
प्रतिक्रिया