पूर्वराजा शाहलाई ओलीको चुनौती : ‘लोकप्रिय छु भन्ने लागेको भए चुनाव लड्नुस्’

काठमाडौं । प्रधानमन्त्री केपी शर्मा ओलीले मुलुकको शासन गर्नका लागि निर्वाचनबाट आउन पूर्वराजा ज्ञानेन्द्र शाहलाई चुनौती दिएका छन् ।

बिहीबार महोत्तरीमा ‘नेपाल पल्प एण्ड पेपर इण्डस्ट्रिज प्रालिले’ सञ्चालनमा ल्याएको कागज कारखानाको उद्घाटन गर्दै उनले पूर्वराजा शाहलाई चुनौती दिएका हुन् ।

उनले नेपाली जनताले फालेका राजतन्त्रलाई पुनः फर्काउन भन्दै नाराबाजी भइरहेको बताए । उनले मानिसहरु कुर्सीमा बस्दा राजा हुने दिन गएको जिकिर गरे । उनले लोकप्रिय लागेको भए निर्वाचनमा लड्न चुनौती दिए ।

छायाँ अघि सारेर नभइ आफैँ राजनीतिक दल खोलेर निर्वाचन लड्न उनको चुनौती छ । अब नेपालमा जन्मिदै राजा हुने प्रणाली स्वीकार्य नहुने बताए । संविधान र लोकतन्त्रको बाटो समातेर अघि बढ्न सबैलाई खुला रहेको बताए ।

प्रधानमन्त्री ओलीले देश विकास निर्माणका कामबाट अघि बढिरहेको भन्दै दाबी गरे । उनले आफू मधेसविरोधी नभएकोसमेत बताए ।