९ हजार बढी बाख्रालाई पीपीआरविरुद्धको खोप

कञ्चनपुर । शुक्लाफाँटा नगरपालिकाका ९ हजार ९ सय ६९ बाख्रालाई पीपीआर रोग विरुद्धको खोप लगाइएको छ । नगरपालिकाका आठ वटा वडामा पशु प्राविधिक परिचालन गरी निःशुल्क रूपमा खोप लगाइएको हो ।

नगरपालिकाको पशु विकास शाखा प्रमुख रामप्रसाद भट्टले व्यावसायिक बाख्रा पालन गरिएका वडामा यही माघ २० देखि २६ गते सम्म खोप अभियान सञ्चालन गरिएको जानकारी दिए ।

उनका अनुसार कृषि तथा पशुपन्छी विकास मन्त्रालयबाट दश हजार डोज खोप प्राप्त भएकामा ९ हजार ९ सय ६९ डोज खोप बाख्रालाई लगाइएको छ । ‘घातक संक्रामक रोग पीपीआरका कारण नगरपालिका क्षेत्रमा व्यावसायिक बाख्रा पालन गरेका किसानले क्षति व्यहोर्दै आएका थिए,‘ पशु शाखा प्रमुख भट्टले भने, ‘त्यसलाई न्यूनीकरण गर्न खोप अभियान सञ्चालन गरेका हौँ ।’ 

यस रोगका कारण बाख्रामा कडा ज्वरो आउने, सिँगान बग्ने, आँखामा -याल काढ्ने, चिप्रा (कचेरा) देखिने, छेर्ने, मुख तथा गिजामा पानी फोका जस्ता घाउ आउने र घाँस खान नसकेर बाख्राको मृत्यु हुने गर्छ । 

एक पटक खोप लगाइ सकेपछि तीन वर्ष सम्म खोप दिनु नपर्ने पशु प्राविधिक लक्ष्मीदत्त जोशीले बताइन् । सरकारले खोप अभियान सञ्चालन गरी सन् २०३० सम्ममा पीपीआर खोप नियन्त्रण गर्ने लक्ष्य लिएको छ ।