सिराहामा सीमा क्षेत्रमा चेकजाँचका लागि खटिएका सशस्त्रका सईको गाडीको ठक्करबाट मृत्यु

काठमाडौं । सिरहामा नम्बर नखुलेको गाडीको ठक्करबाट सशस्त्र प्रहरीका एक जना नायव निरीक्षक (सई) को मृत्यु भएको छ । बरियारपट्टी गाउँपालिका–१ कचनारी बोर्डर नजिक भएको यो घटनामा सई लक्ष्मण यादवको मृत्यु भएको हो ।

नेपाल–भारत सीमा क्षेत्रमा चेक जाँचका लागि खटिएका सई यादवलाई ठक्कर दिएपछि सो गाडी भागेको थियो । गाडीको ठक्करबाट गम्भीर घाइते यादवको आज बिहान उपचारको क्रममा प्रादेशिक अस्पताल लहानमा मृत्यु भएको सिरहाका प्रहरी प्रवक्ता डीएसपी वीरेन्द्रकुमार पासवानले जानकारी दिए ।

ठक्कर दिने गाडीको खोजी भइरहेको र घटना विषयमा थप अनुसन्धान भइरहेको जिल्ला प्रहरी कार्यालय सिराहाले जनाएको छ ।