आफ्नै अभिव्यक्तिले पूर्ववनमन्त्री महतो अप्ठेरोमा

काठमाडौं । पूर्वमन्त्री एवं जनता समाजवादी पार्टीका सांसद वीरेन्द्रप्रसाद महतोलाई कारबाही गर्न माग गर्दै प्रतिनिधि सभाको राज्यव्यवस्था तथा सुशासन समितिमा उजुरी परेको छ ।

छोराको समकक्षता पत्र लिँदा शिक्षा मन्त्रालयअन्तर्गतको सानोठिमीस्थित कार्यालयलाई बिचौलियामार्फत् पाँच हजार रुपैयाँ घुस दिएको भन्दै नेकपा (माओवादी केन्द्र) का मधेस प्रदेश सांसद रहवर अन्सारीले उनलाई कानुनबमोजिम कारबाही गर्नुपर्ने माग गर्दै बुधबार समितिमा निवदेन दिएका हुन् ।

‘भ्रष्टाचार निवारण ऐन २०७९ को दफा ३ को उपदफा ३ मा रिसवत लिने/ दिनेलाई सजायको व्यवस्था छ । रिसवत् दिने कामलाई रोक्नुको सट्टा त्यसलाई प्रोत्साहन गरेको हुँदा महतोलाई कानुनबमोजिम कारबाही गरियोस्,’ अन्सारीले निवेदनमा लेखेका छन् । पूर्ववनमन्त्री महतो स्वयंले गत साउन ६ गते प्रतिनिधि सभाको रोस्टमबाटै छोराको समकक्षता लिनका लागि आफूले ५ हजार रुपैयाँ घुस दिएको र घुस दिएपछि काम बनेको बताएका थिए । ‘म भूपू मन्त्री, मैले हिजो शिक्षा मन्त्रालयको सानोठिमीमा ५ हजार घुस दिएर आएको छु, कसले पत्याउँछ ? पत्याउनु हुन्छ ? मेरो छोराको समकक्षता गर्नुपर्ने थियो, मैले ११ बजे पठाएको ३ बजेसम्म यो मिलेन त्यो मिलेन भने । म आफै गएको थिएँ, एउटा अधिकृतले कागज मिलेको छैन भने, कागज मिलेन भन्दै चिया खाने समय भयो भने ।

४ बजेसम्म आएनन् । बिचौलियालाई गएर ५ हजार दिएँ, ५ मिनेटमा काम गरेर ल्याइदियो । अनि हामी सुशासनको कुरा गर्छौं,’ संसदको रोष्ट्रमबाटै उनले भनेका थिए । गृहमन्त्री रमेश लेखकले मंगलबारको संसद बैठकमा यस घटनाबारे आफूले पूर्वमन्त्री महतोसँग पनि जानकारी लिएको र थप अनुसन्धान गर्न प्रहरीलाई भनिएको बताएका थिए । महतोको अभिव्यक्तिपछि छानबिन गर्न शिक्षा मन्त्रालयले पनि समिति बनाएको छ ।