काठमाडौं । सभामुख देवराज घिमिरेले संसदीय समितिका सभापतिहरुलाई महत्वपूर्ण बिषयहरु चाँडो छलफल गरेर टुंग्याउन र आउँदो बजेट अधिवेशनमा संसदमा प्रस्तुत हुने वातावरण बनाउन निर्देशन दिएका छन् ।
आज सबै समितिका सभापति, दलका प्रमुख सचेतक र सचेतकहरुलाई बोलाएर सभामुख घिमिरेले समितिहरुलाई प्रभावकारी बनाउन सुझाव दिएका छन् ।
छलफलपछि सभामुख घिमिरेले महत्वपूर्ण विधेयकहरुलाई विलम्व नगरी समितिमा छलफल सकेर संसदको आगामी बैठकमा निर्णय हुनेगरी प्रस्तुत गर्न सरसल्लाह भएको सम्वाददाताहरुसँग बताए ।
बजेट अधिवेशन कुनै बाधा अवरोध नभई अघि बढ्नेमा आफू विश्वस्त रहेको बताउँदै घिमिरेले संसदलाई प्रभावकारी बनाउन सबै दलहरुको समान चासो रहने बताए ।
आगामी अधिवेशन अघि नै राजनीतिक दलका नेताहरुसँग संसदलाई प्रभावकारी बनाउने बिषयमा परामर्श गर्ने सभामुखले बताए ।
सभापति र प्रमुख सचेतकहरुको छलफलमा अख्तियार दुरुपयोग अनुसन्धान आयोग, संवैधानिक परिषद सम्बन्धी ऐन संशोधन र अन्य महत्वपूर्ण विधेयकबारे चर्चा भएको थियो ।
सार्वजनिक लेखा समितिका सभापति ऋषिकेश पोखरेलले संसद र संसदीय समितिले गरेका निर्णयको कार्यान्वयन गराउने कुरामा अडिग रहेर निर्देशन दिन र त्यसको जिम्मेवारी लिन सभामुखलाई सुझाव दिईएको बताए ।
राज्य व्यवस्था तथा सुशासन समितिका सभापति रामहरि खतिवडाले संसदीय समितिका निर्णयलाई कडाईकासाथ कार्यान्वयन गर्न सरकारलाई निर्देशन दिने र अनुगमन समेत गर्न आवश्यक भएको भनेर सभामुखलाई सुझाव दिएको बताए ।
संसदीय समितिले गरेका निर्णय र निर्देशनहरुको पालना नभएको देखिएकाले सरकारका सम्बन्धित निकायसँग समितिका सभापतिहरु असन्तुष्ट रहेको बुझिएको छ । समितिले निर्देशन दिएपनि उच्च तहको नेतृत्वको हस्तक्षेपले सम्वेदनशील बिषयहरु थान्को लाएर सरकारी निकायले समितिलाई नटेर्ने गरेको एक सभापतिले सुनाए ।
यो खबर पढेर तपाईलाई कस्तो महसुस भयो ?
प्रतिक्रिया