गैरीगाउँ हत्या प्रकरण : सञ्जयलाई आजीवन काराबासको माग गर्दै मुद्दा दायर

काठमाडौं । गैरीगाउँमा ४ जनाको सामूहिक हत्या गरेका २३ वर्षीय सञ्जय भण्डारीविरुद्ध मुद्दा दायर गरिएको छ ।सरकारी वकिल कार्यालयले भन्डारीलाई बाँचुञ्जेल जेल (आजीवन काराबास) को मागदाबीसहित अभियोगपत्र दायर गरेको हो ।

प्रहरीले आरोपी भण्डारीले नै हत्या गरेको प्रमाणसहितको प्रतिवेदन जिल्ला सरकारी वकिलको कार्यालयमा बुझाएको थियो ।

व्यक्तिगत प्रतिशोध (रिसिबी) का कारण हत्या भएको प्रहरीको निष्कर्ष छ । प्रहरीको बयानका क्रममा सञ्जयले अन्य व्यक्तिको पनि हत्या गरेको बताएका थिए ।

भदौ २९ गते राति ११:५५ बजे उक्त घटना भएको थियो । घटनामा कुमार भन्ने पूर्णबहादुर भुजेल, उनकी श्रीमती अम्बिका भुजेल, कुमारकी आमा शुभद्रा भुजेल र मोरङ बेलवारी स्थायी घर भएका नवीन भन्ने विशाल राईको हत्या भएको थियो ।