नेता रावलले लगाए कू-प्रचारको आरोप

काठमाडौं । सत्तारुढ नेपाल कम्युनिष्ट पार्टीका नेता भीम रावलले आफूमाथि ‘कसैको खबरी भन्ने जस्तो निकृष्ट प्रायोजित कुप्रचार भएको आरोप लगाएका छन् । 

चार घण्टा अगाडी उनले ट्वीटरमार्फत आफूमाथि ‘कसैको खबरी भन्ने कू-प्रचार गरिएको आरोप लगाएका हुन् । 

'नेपालमा सुरक्षा स्थिति बिग्रिएको बेला संभवत क्षमता र अनुभव हेरेर होला गृहमन्त्रीमा मेरो नियुक्तिलाई अमरिकी कूटनीतिज्ञले मात्र होइन प्रमुख देशका कूटनीतिज्ञले स्वागत गर्दै विशेष सुरक्षा नीतिको समर्थन गरेका थिए ।यसलाई कसैको खबरी भन्ने जस्तो निकृष्ट प्रायोजित कुप्रचार गरिदै छ ।' रावलले ट्वीटरमा लेखेका छन् । 

त्यसपछिको ट्वीटमा उनले लेखेका छन्, 'नेपाल आमालाई गालिगलौज गर्दै टुक्र्याउन विदेशीहरूसंग समेत साँठगाँठ गर्ने सीके राउतलाई राष्ट्रिय हिरोको सम्मान दिदै अलग देशको नेतासंग झै सम्झौता गरी स्वतन्त्र मधेश र स्वशासन जस्ता संविधान विपरीतका कुरा, मेरो विरूद्धको कुप्रचारको थोत्रो बर्कोले छोपिने छैनन् ।'