काठमाडौं । कोशी प्रदेशका प्रदेश प्रमुख परशुराम खापुङले कोशी प्रदेश आर्थिक अध्यादेश २०८० र कोशी प्रदेश विनियोजन विधेयक २०८० जारी गरेका छन् ।
कोशी प्रदेश सरकारको प्रस्तावमा प्रदेश प्रमुख खापुङले २ अध्यादेश जारी गरेसँगै भदौ १० देखीको बजेट शुन्यता आजबाट हटेको हो ।
आइतबार प्रदेश प्रमुख खापुङले संविधानको धारा २०२ को उपधारा १ बमोजिम अध्यादेश जारी गरेका हुन् ।
माओवादी केन्द्र र जनता समाजवादी पार्टीले मुख्यमन्त्री हिक्मतकुमार कार्की नेतृत्वको सरकारलाई दिएको समर्थन फिर्ता लिएसँगै अल्पमतमा परेका कार्कीले जेठ ३२ गते अध्यादेशबाट वार्षिक आयब्याय प्रस्तुत गरेका थिए । कार्कीले अध्यादेशबाट ३६अर्ब २४ करोड ३५ लाख १० हजार बराबरको वार्षिक बजेट प्रस्तुत गरेका थिए । उक्त बजेट भदौ १० गतेबाट निष्क्रिय भएको थियो ।
गत असार १४ गते प्रदेश सभामा उक्त अध्यादेश टेबुल भए पनि ६० दिनभित्र प्रतिस्थापन विधेयक ल्याइसक्नुपर्ने संवैधानिक प्रावधान कार्यान्वयन हुन नसक्दा बजेट शुुन्यतामा गएको थियो । त्यसबीचमा कोशीमा विभिन्न चरणमा सरकार बन्दै र भत्किँदै गरेको अवस्थाले बजेट आउन सकेको थिएन ।
शुक्रबार सर्वोच्च अदालतको परमादेशसँगै कार्की पुुनः मुख्यमन्त्री नियुक्त भएसँगै अध्यादेशमार्फत बजेट ल्याइएको हो ।
