काठमाडौं । कोशी प्रदेशका मुख्यमन्त्री उद्धव थापाले विश्वासको मत संविधान विपरित रहेको भन्दै एमाले अदालत जाने भएको छ ।
सोमबार मुख्यमन्त्री थापाले विश्वासको मत लिएका थिए । तर सभाध्यक्ष इस्राइम मन्सुुरीले समेत मुख्यमन्त्रीलाई विश्वासको मत दिएपछि कोशी एमाले अदालत जाने भएको हो ।
आज कोशी प्रदेश प्रेस चौतारीले गरेको कार्यक्रममा बोल्दै कोशी प्रदेश एमाले संसदीय दलका नेता समेत रहेका हिक्मत कुमार कार्कीले सो कुरा बताएका हुुन् ।
‘प्रदेश नियमावली र संविधानका धारा छलेर जाने ठाउँ छैन, त्यसविरुद्ध हामी कोर्ट जान्छौं, हामीसँग अर्को विकल्प छैन ।’ उनले भने ।
प्रदेशमा पहिचानवादीहरुको आन्दोलन रहेका बेला उनीहरुको आवाज गठबन्धन दलका नेताहरुले सुन्न नचाहेको समेत आरोप लगाए ।
कुन शक्तिले उचालेर प्रदेश अशान्त रहिरहेको छ भन्दै प्रश्न समेत गरे ।
‘यो कसरी आइरहेको छ ? कुन शक्ति केन्द्रको उक्साहटमा भइरहेको छ सचेत हुनुपर्छ’, नेता कार्कीले भने,’राष्ट्रिय अखण्डता, मुलुकको सार्वभौम सत्ताविरुद्ध लाग्न खोजिएको त छैन ?’
कोशीमा सभामुखले राजीनामा दिएको अवस्थामा उपसभामुखले सभा सञ्चालन गर्ने प्रावधान रहेको छ । तर उपसभामुख सिर्जना दनुवार बिरामी भएको भन्दै काठमाडौं आएपछि सभा सञ्चालनको जिम्मेवारी कांग्रेसका सांसद एवं जेष्ठ सदस्य मन्सुरीलाई दिइएको थियो । सभाध्यक्षको जिम्मेवारी पाएको व्यक्तिले निष्पक्ष भूमिका खेल्नुपर्नेमा दलको पक्षपोषणमा लागेको भन्दै एमालेले नाराबाजी समेत गरेको थियो । यसअघि पनि माओवादीबाट निर्वाचित बाबुराम गौतमले उनै थापालाई मतदान गरेपछि एमाले सर्वोच्च पुुगेको थियो । सर्वोच्चको फैसला अनुसार थापा नेतृत्वको कोशी प्रदेश सरकार ढलेको थियो ।
