जानकी मन्दिरसंग जोडिएको मस्जिद हटाउन राष्ट्रिय एकता अभियानको माग

काठमाडौं । राष्ट्रिय एकता अभियान धनुषा शाखाले शनिवार जनकपुरमा ‘संघिय हिन्दु गणतन्त्र नेपालका लागि विचार गोष्ठी’ को आयोजना गरेको छ।

गोष्ठीमा नेपाललाई हिन्दु राष्ट्र वनाउने विषयमा व्यापक छलफल भएको छ। कार्यक्रमका प्रमुख अतिथी तथा राष्ट्रिय एकता अभियान सम्मेलन आयोजक समितिका संयोजक विनय यादवले नेपाललाई संघीय गणतन्त्र सहितको हिन्दु राष्ट्र कायम गर्न माग गरे।धर्मनिरपेक्ष संविधानमा मुस्लिम आयोगको आवश्यकता नरहेकोले तत्काल खारेज गर्न वा हिन्दू, बौद्ध, किरात धर्मका लागी पनि आयोग को व्यवस्था गर्नु पर्ने माग राखे। यादवले जनकपुर स्थित जानकी मन्दिर सम्पूर्ण नेपालीहरुको भावना सँग जोडिएको र विश्व सम्पदा रहेको हुनाले षड्यंत्रपूर्वक ढंगले जानकी मन्दिरसँग जोडिएर बनेको मस्जिद हटाउन जोड दिए ।

विदेशी डलरको लालचमा फसेका विचौलीया नेताहरुले सनातन हिन्दु राष्ट्रबाट हटाई धर्म निरपेक्षता कायम गरेको उनको आरोप छ। ‘हामी संघीयता विरोधी होइनौँ तर संघीयताको नाममा हाम्रो हिन्दु धर्म, सभ्यता, संस्कृति र पहिचानमाथिको प्रहार कुनैपनि हालतमा स्वीकार्य छैन’ यादवले भने–‘हामी लोकतन्त्र पक्षधर भएकाले संघीय गणतन्त्र सहितको हिन्दु राष्ट्रका लागि अभियान मार्फत हाम्रो आन्दोलन जारी राख्छौँ।’

तुस्टीकरण राजनीतिले हिन्दु धर्म, सभ्यता, संस्कृति र पहिचानमाथि प्रहार गर्ने मात्र नभई मुलुकलाई भ्रष्टाचारको अखडा बनाईएकोमा समेत यादवले चिन्ता व्यक्त गरे। कार्यक्रममा अब हिन्दु राष्ट्रका लागि मात्र नभई देशलाई भ्रष्टचार र भ्रष्ट मुक्त बनाउने दायित्व पनि काँधमा बोक्नु पर्ने विचार ब्यक्त गरिएको थियो।

कार्यक्रममा अभियानी बन्दना पाण्डेय, डा। वीरेन्द्रप्रसाद यादव, मुरलीमनोहर मिश्र लगायतका बक्ताहरुले आफनो विचार व्यक्त गरेका थिए। अभियानका धनुषा संयोजक मनीष पुर्बेको अध्यक्षतामा सम्पन्न कार्यक्रमको संचालन विकास झा र रवि साहले गरेका थिए।